智取大市：科網幾時見頂？
■科網股越升越有，舜宇光學技術指標顯示未見頂。 資料圖片
近千隻股下跌，但科網股就越升越有，呢個情況唔係未見過，就喺2013年底至2014年初，當時科網濠賭股喪炒，其他股票完全冇運行，兩極化嚴重程度不下於今日。至於今時今日，更有趣嘅係，喺大部份股票弱勢之下，
恒指向上突破20個月高位，係大時代後跌市以嚟最高，連恒指都歸化咗少數陣營，的確夠詭異。
資金由多數股份流出，湧去少數股份，兩極化情況會進一步加劇，直到科網股嚴重超買、物極必反為止。點解？原因係基金為咗與大市同步，先沽出樓上蟹貨多多聲嘅股票，然後前仆後繼去買樓上冇蟹貨嘅股票。短期內可遇見嘅情況，係破頂股會繼續破，沉底股會繼續沉。
所謂嚴重超買，圖表分析上最可靠嘅指標係頂背馳。早前講過，一隻大價股嘅日線圖喺升勢時出現MACD擴散三角形，就係升浪末段，但往往MACD破頂、股價先會見頂。舜宇（2382）MACD已形成擴散三角形，但MACD有排未破頂，即係股價未升完。見頂訊號必然配合RSI雙頂或三頂背馳，目前舜宇RSI第一個頂都未做完，同樣顯示股價短線未有耐會見頂。去到日線圖MACD破頂及RSI頂背馳訊號出嚟嘅時候，股價相信喺70蚊樓上了。
晉佳
http://www.facebook.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com