【實力取勝】教你如何有型地炒股票（陳承龍）（第122期）
2017-4-27 17:30:23
弊啦！依家日日靠把口搵食，支筆有啲生硬，唔係好識寫嘢。無辦法啦！依家要靠樣搵食嘛，最近仲夥拍大C拍咗個銀行廣告。講真，自從選擇拋頭露面做財經界KOL後，都幾攰同幾辛苦，係喎，由朝做直
播到晚，你都咪話唔攰，仲有喎，邊有咁多嘢講，又驚你哋悶，所以又要諗啲綽頭嘢搞嚇氣氛，得閒又要爆嚇粗（其實我唔係話咁鍾意講粗口），總之要搞到同你睇傳統媒體有好大分別啦。事實上，依家嘅文化要夠貼地，最重要嘅係要接近群眾，所以咪就要由朝做到晚，同埋點都盡量答曬你哋嘅問題囉，唔係點做到夠互動呀?
其實，我研究過一輪點先夠貼地同接近群眾，早前我就請教咗一位喺某大報張副刊嘅高層，佢話依家嗰世界已經同以前唔同咗，以前好多人行啲大型商場，尤其專賣高級品牌的，但係依家有冇發覺冇乜人行?唔係講緊啲自由行，係連本地人都少咗，點解?據呢位高層嘅分析，一來依家有一股反地產霸權心態，二來後生嗰班嘅目標唔同咗，試想嚇，七八十後以前嘅目標較明確，第一件事可能就係買樓，有錢剩到嘅話，可能會買隻名錶之類，但時至今日，買樓對依家後生嗰批嚟講，太遠啦。
呢位高層話，既然買唔到樓，咁唯有做啲容易嘅事情，例如去旅行，所以可能隔一輪就上網睇嚇有冇特價機票，尤其有廉航後，去個台灣平過過澳門。名錶?一來價錢問題，二來依家後生嗰班鍾意一啲有故事嘅嘢，例如買一隻係可以訂做，但又唔貴嘅錶，同埋由於買唔起樓，所以反而有啲錢可以使嚇，但又基於反地產霸權嘅因素下，所以個個突然愛上做文青，或者突然做咗品味撚，專去一啲小店或者依家流行嘅市集，總之賣嘅嘢係有故事或者有特式，所以要接近呢班群眾嘅時候，就要留意呢嘢啦。
講真，做財經本身係幾銅臭，何來有品味呀？但係原來都得嘅，就係要話畀大家知，投資其實都係一件好有型嘅事，例如喺我節目中成日講，輸人唔輸陣，最緊要有氣勢，就算輸都要輸得有型，我示範過啦，唔止一次，而事實上係Work，因為真係有位Fans私信我，話欣賞我炒股票嘅豪邁，話好想學我，我當然都飄飄然啦。講真，我平日都教大家炒股票第一件事要識嘅，就係要有正能量，如果買咗一跌個心就唔舒服，包你好容易屈到病，總之，平常心啦。
至於短期有乜好嘢，講真，我真係覺得大時代嚟緊，市底好強，總之，日日跟實十二點半陳承龍就掂啦。如果跟唔切，就儲定一批中資金融股，我覺得呢轉係因為A股爆上帶動埋港股，當然以中資金融股最受惠啦。至於股仔，其實可以試嚇灑鹽花式，五億市值樓下，隻隻買少少，應該最後可享尾程優惠，不妨試試。
實力取勝 - 陳承龍 舊文
來源 source: http://www.winmoney.hk