地王作動 收租股冷靜
2017年04月28日
美國總統特朗普提出減稅措施，重點大削企業負擔。外界關注焦點係特朗普嘅想法，係美國財赤嚴重同民主黨人拉後腿下，有幾多可以落實。從港股角度，除咗呢啲因素，仲要考慮多一樣，就係若然特朗普透過減稅鼓勵美企將盈利調回本國，會唔會掀起一陣撤資潮。
美利道停車場告別歷史
由於美國要抽重稅，過去多年美資跨國公司都把大量盈利留番係海外，好似蘋果在海外嘅儲存利潤就非常龐大，估計佢手頭有2000億美元現金，當中近一半在國外。蘋果唔將海外資金調返國內，寧願有需要時在本土舉債，原因係唔想繳納昂貴嘅稅款。係民主黨主政時代，雖然已經有人提出鼓勵佢哋調錢返美國投資，但總統奧巴馬一直拒絕讓步，特朗普競選嘅時候提出減稅，當時已經話考慮豁免或調低美企調錢返去嘅稅款，藉以鼓勵佢哋增加投資。
而家特朗普執政滿百日，大家見唔到佢有乜實績，佢都盡量想找吓數，所以提出減稅方案，外界就估佢係國會嘅阻攔下，究竟落實到幾多。我就比較留意，一旦美資調錢回朝，會唔會掀起一片走資風，若然係咁就對港股唔係咁盞鬼。講起美企嘅資金動作，呢個星期港匯都有啲壓力，跌到去低位。聽銀行界講，主要係早前美國加息，香港不止無跟，拆息仲向下回落，搞到港元腳軟，不過暫時就睇唔到有好多資金流走。
美資係咪會調錢走呢？有中環茶友話除咗睇稅率外，仲要睇美國有幾多投資機會，因為掉咗錢返去如果唔可以錢生錢，咁都係得個搞字，所以成個計劃要有配套；另一樣就係而家美企存錢，唔知有幾多係投放咗係香港或亞洲市場。過去，美資好多錢都係放係愛爾蘭呢啲離岸稅務天堂，咁究竟香港幾多就唔知，當特朗普嘅減稅計劃再具體啲，就要留意相關影響嘞。
中環茶友昨日另一個話題，就係過埋呢個月，中環美利道停車場就會完成歷史使命，以後去中環泊車又少咗個地方。美利道停車場跟住就會拍賣，而家中環商業地咁渴市，呢塊地王創出歷史高價已經可以講係無乜懸念，而家等緊揭盅嘅只係去到幾癲啫。市場傳緊話以高價拍地聞名嘅海航都好有興趣攞呢幅地，所以呢排中環嘅分層寫字樓，已經炒到飛沙走石。
大業主股價未見反應
呢幅地王可以起46萬呎樓面，本來諗住係首季就招標，可能後來政府見盈餘爆得太緊要，接手做財爺嘅陳茂波估幾個月嘅盈餘都有機會差幾百億元，所以就押後到下個月招標，預計截標日期係12號。呢啲通常價高者得嘅項目好快會開標，市場話3萬元一平方呎已經係預期之內，屆時好明顯又係會麵粉貴過麵包。係地王誕生前夕，區內大業主好似新地(016) 、長實(1113) 股價都無異動。係佢附近有寫字樓收租嘅冠君信託(2778) 仲逆市微跌，收報4.98元㖭，唔知大家係驚招標結果返高潮；抑或等於埋長假先埋位嘞。
期指結算，港股昨日開市升抵20個月高位24663，雖然內地股市早段插低，上證指數一度穿3100水平，令港股轉升為跌，隨著A股企穩，恒指成功高收報24698，升120點；國企指數收報10261，跌56點，成交763億元。友邦保險(1299) 首季業績數據靚仔，急升6%，收報54.5元；騰訊控股(700) 再創新高價245元，收市升幅收窄，仍有1.2%進帳，報244.6元。科技股繼續造好，瑞聲(2018) 升1.7%，報108.4元；金山軟件(3888) 升2.5%，報22.3元。
陸羽仁
金融High Tea 舊文
來源 source: http://hdfin.stheadline.com