地王效應褪色
2017年05月16日
港股呢排好似食左藥咁，興奮狀態有點異常，指數略為高開後持續走高，結果又再創出接近兩年的高位。雖然恒生指數上升，暫時仲係維持個別大股支撐大局，升勢唔係咁全面。呢排先係科網股發威，昨日輪到中字股，有中環茶友就留意到地產股繼續跑輸大市，恒生地產分類指數
只係升左0.38%，同恒指0.86%及國指1.63%嘅升幅比再度落後，佢估可能同中港政府聯手為樓市降溫有限。
上個星期，金管局公佈，係近日對銀行的審查發現，部份近期買地及發展項目的發展商，以高槓桿方式為項目進行融資，因此要加強銀行借貸予發展商的信貸風險管理。下月起，在建築融資方面，銀行向發展商提供的融資上限，由地價成本的50%及建築成本的100%，下調至地價成本的40%及建築成本的80%。整體貸款上限，則由不超過物業完成後預期價值的60%，下調至50%。呢樣嘢相信係想遏止內房商高價投地後，係香港進行借大錢投資。
傳阿爺叫中資克制
雖然金管局無講呢樣嘢係針對乜嘢，但茶友就留意到，當日原先估值超過200億元的中環美利道商業地截標，最後只接獲9份標書，而且入標者係世茂房地產(813) 、南豐集團獨資、長實地產(1113) 獨資、會德豐(020) 、恒地(012) 獨資、華人置業(127) 獨資、中渝置地(1224) 。好多過去兩年投地好勇嘅內房集團都無出手，亦唔見有傳聞中好有興趣投地自用嘅內地金融機構現身。本來，地王開始話推出嚟賣，估值只係100億元左右，隨住中資買地愈買愈買，估計就不提扯高，去到埋門一腳，仲估到話超過二百億元， 但上星期五大家見到中資嘅清兵似乎缺席，看漲情緒即時降左溫。
中資搶地王無事前估計咁洶湧，金管局出招可能表面原因，茶友話，早排佢聽位政商猛人講，話內地管理層見到內資嚟香港投地，搞到地價貴得咁緊要，仲連住宅樓價都扯高晒，已經同投地最勇嘅內資打招呼，叫佢地克制吓，果然上個星期就唔見佢地有出嚟搶地王嘞。如果係咁講，內資唔係對本港房地產無興趣，只係奉命忍手。如果無左內資出價，相信成交價好難學到先前估咁高，但咁樣其實健康啲，對香港樓市同地產行業其實都唔係壞事吖。
中港金融股做火車頭
雖然地王效應睇嚟會褪色，但地產股對大市而家嘅影響已經大減，係滙控(005) 及中資金融股帶動下，恒指曾高見25385，升幅達229點，尾市於高位徘徊，恒指收報25371，升215點；國企指數收報10450，漲167點，成交813億元。
滙控連升9個交易日，一度高見68.95元，收報68.85元，升1.1%，為恒指帶來28點升幅。
另外中資金融股向好，建行(939) 升左1.7%，報6.48元；工行(1398) 升1.4%，報5.15元；中行(3988) 升2.4%，報3.89元，三大行合共又為恒指貢獻74點升幅。
其他藍籌股騰訊(700) 再創新高，一度高見260.6元，收報259元，升0.31%；友邦(1299) 升0.54%，報55.7元；港交所(388) 漲0.82%，報197.1元。
陸羽仁
金融High Tea 舊文
來源 source: http://hdfin.stheadline.com