滙控換班搞靚業績
2017年05月05日
美國議息結果公佈，預期同市場差不多。由於美息好大機會係六月份調升，加上美股升咗上高位，所以儲局雖然唔加息，但港股係科技股調整帶動下，都要唞吓氣。
儲局話美國經濟基調強健，令市場相信下月加息機會大。美總統特朗普係競選嘅時候，批評儲局主席耶倫唔
夠膽大力加息，但到佢入主白宮後就開始轉調，讚耶倫之餘仲暗示唔使咁急加息。一向做開鴿派嘅耶倫就變番強硬啲，連續兩次會議後的聲明都暗示今年會有4次或以上嘅加息，同時會議紀錄仲提到會縮減資產負債表，變相向市場抽水。
臨別秋波要留好印象
自從美國加息同特朗普上台後，美股反覆向上，無受利率調高影響。呢個其實係幾典型嘅加息反應，一般而言，加息代表經濟升溫，市場上頭腦發燒嘅人多，佢哋未必一開始俾人淋冷水就會降溫。過去美國加息好多時係半厘、半厘咁加，同而家只係四分一厘碎步前行唔同。不過，下個月如果美息再升，市場會唔會慢慢擔心經濟放慢，就要到時至知，可以講嘅係個市如果升得愈高，風險就相應上調。
美息向上，理論上利好銀行股。儲局取態利率將會上調，滙控(0005) 係業績公佈前已經造好，中午集團公佈第一季列帳基準除稅前利潤為49.61億美元按年下跌19%，由於去年有賣產因素，經調整後，除稅前利潤則按年升12%，反映貸款減值及其他信貸風險準備下降，以及收入上升。行政總裁歐智華係評論業績時話，季內炒房業務表現出色，零售及財富管理表現理想，繼續削減風險加權資產及節約成本，貫徹重返亞洲的計劃。以綜合券商預測稅前預測中位數為43.05億元計，市場解讀為好過預期。
如果按季度比較，大笨象首季叫做扭虧為盈，去年第四季集團錄稅前虧損34.45億元，業績公佈後股價即時碌低。呢次佢公佈業績，同時透露資本比率改善，管理層在監管機構批准下，會考慮再推回購。不過，管理層亦都開始做吓期望管理，話要考慮資本點樣運用對股東最有利，市場唔應該期望季季有回購。坦白講，如果管理層攞啲錢投資有好回報，業績增長好，大家都會同意唔使回購，呢樣嘢其實畫公仔唔使畫出腸啦。
科網股借勢回吐
未來滙控做生意有無生方向，令人諗到係佢已經物色咗新主席，未來好大機會換埋行政總裁，咁係交班之前，相信現管理層好大誘因造靚表現，好同自己有個靚啲戰績先落台。係市場受落業績兼憧憬再回購下，滙控大升近3%收市，報66.35元，同日宣佈派發第一次中期息1.2元的恒生(011) 亦造好，升2.66%，報162.元，大小雙象仲同時仲令恒指跌幅大大收窄。恒指收報24683，微跌12點，國企指數收報10088，跌85點，成交797億元。
假前兩個表現唔錯嘅板塊都出現回吐，蘋果公司股價於季績後，周三晚出現調整，本港部份科技股周四也現回吐，騰訊(700) 經周二再破頂後，周四跌1.8%，報243.8元；瑞聲(2018) 跌3%，報109.9元；舜宇光學(2382) 更跌4%，報64.3元。濠賭股亦現整固，永利(1128) 跌3%，報16.58元；澳博(880) 股價及相關新聞跌2.5%，報7.41元；銀娛(027) 跌2%。
陸羽仁
金融High Tea 舊文
來源 source: http://hdfin.stheadline.com