智取大市：美國泡沫未完結
■喺美股真正癲市前，嚟緊調整可以視為買入機會。 資料圖片
港股中線調整浪已經出現，短線就要忍手唔買。不過，所謂唔買可能只係短線嘅事，因為稍後仍可能要擁抱一場泡沫。點解？或許講番美國加息，同埋聯儲局計劃年底開始收縮資產負債表。
自2008年金融海嘯後，聯儲局資
產負債表增加超過3倍，但同期睇番美國M2，只係增長六成左右，反映美國開動印鈔機後，資金並非完全流去市場。不過，情況開始有轉變，過去一年，美國M2增幅達到6%，但GDP增幅估計只有2%或更低，M2增幅繼續拋離GDP嘅話，肯定會形成泡沫。聯儲局為咗阻止資金泡沫出現，縮表係必然嘅事，問題係，今年開始縮表算唔算遲。
只要將聯儲局資產負債表增幅，拍埋同M2增幅比較，就知道聯儲局即使縮表，對於未來M2增長嚟講，睇唔出有乜大關係，早年聯儲局開印鈔機嘅效應，今時今日、甚至未來先係真正白熱化，因此先要同時加息，期望能起作用。同一時間，聯儲局亦不可能做推手，加快縮表而導致冧市，所以只能控制市場預期，縮表要慢慢做，永遠只會做得太少。正正因為縮表同時加息，作用仍有限，所以喺美股真正癲市前，嚟緊調整都可以視為買入機會。
晉佳
http://www.facebook.com/advanceguy1
本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
晉佳
智取大市 - 晉佳 舊文
來源 source: http://hk.apple.nextmedia.com