港股「鷹」聲下挫
2017年06月16日
聯儲局開會後宣佈加息，美股係消息明朗後高收，再創歷史新高，但港股就開市腳軟，而且下午再度尋底，反映本地投資者對今次上調利率反應比外圍敏感。
聯儲局公佈後加息之餘，同時披露未來利率動向同削減資產負債表規模，取態較「鷹」。根據央行官方對利率的
預測，今年利率有會再加一次，未來兩年會共加六次息，幅度為一厘半。同一時間，儲局會逐步減少投放在市場嘅資金，即係所謂收縮資產負債表，市場估計9月就開始，咁即係話未來借錢會貴咗，而且係市場可以運用嘅資金會少咗。
消息公佈後，美元轉強，美股亦無跌，杜指高收46點，報21375點。不過，港股情況就唔同，恒生指數低開後一直見唔到反彈恒指收報25565點，跌310點，再創6月以來低位；國企指數報10346點，跌168點，成交743億元。
金管局陳總淋冷水
港股跌幅比較大，一個解釋係過去美息向上，香港都無跟加，本來估計今年都未必會加息，但隨住港元轉弱，已經去到7.8，情況似乎有啲唔同咗。金管局總裁陳德霖係加息後就跳出來淋冷水，提醒隨著美息上升，港元資金加快流走，港息都會跟加。
近期已經有部份銀行輕微上調按息，相信若港息上升，銀行亦會逐步調高按息。渣打集團(2888) 旗下渣打大中華及北亞地區金融市場部主管陳銘僑就覺得，若聯儲局下半年再加息一次，港元拆息會上升，但未必緊貼美息的加幅，需視乎屆時港匯水平。目前本港不少樓按很均屬是用銀行同業拆息計算的H按，若拆息上升，供樓負擔增加。
至於最優惠利率(P息)要同業拆息升至某一水平才會上升，目前最優惠利率暫無上升壓力。現時港匯亦無大變動。對於聯儲局今次宣佈加息及公佈「縮表」，市場反應冷靜，仍有資金流入債市，但他認為大家危機意識減低，一旦情況逆轉，市場走火，「郁起嚟會郁得很快」。
港股昨日跌得幾全面，大股多數跌，唔係只跌地產股，新地(016) 跌1.7%，但內銀如建行(939) 照計和美國加息無關，亦跌1.7%，中移動(941) 跌0.8%，受惠於息差擴闊的滙控(005) 都跌1.1%。
港股反應比較強烈，主要係指數之前升得比較多。有人話美股都升得多啦，點解佢無跌先？咁係因為美國聯儲局係幫美國人服務，佢嘅加息決定係考慮美國經濟，覺得美國頂得順先至郁手，香港唔係佢考慮之列。香港呢排樓價地價急升，對利率反應自然敏感啲，加埋匯價有壓力，咁咪令指數明顯回吐。估計後市都要適應吓新嘅環境，同埋睇吓下個星期A股入摩有乜消息，投資者手頭如果有銀彈想撈貨短炒，可以等插深少少先至出手。
建成趁新股熱招股
近排新股掛牌表現回勇，模板工程分包商建成控股(1630) 今日在主板掛牌，上市前夕暗盤價走高，曾報0.5元，較招股價0.38元，高出32%。係首掛有肉食下，內地汽車塑膠電鍍零件供應商信邦控股(1571) 公佈在港上市計劃，將發行2.5億股，當中10%於香港公開發售，每股招股價介乎3.13至3.42元，以每手1000股計，入場費為3454.46元。股份將在今日(16日)至6月21日公開招股，預計6月21日定價，6月28日掛牌，是次上市的獨家保薦人為法巴。
陸羽仁
金融High Tea 舊文
來源 source: http://hdfin.stheadline.com