中環在線：
王衞馬化騰曬友情抗馬雲
■馬化騰（左）與王衞（右）一人一句好夾，交情非淺。
順豐速運創辦人王衞出名低調，好少見到佢真人，不過佢最近好紅，事關佢同馬雲鬧翻了，馬雲旗下菜鳥網絡早前要求順豐交出客戶數據，順豐唔制。噚日王衞竟然高調地，應騰訊（700）老闆馬化騰之邀出席研討會，
兩人喺台上你一言我一語，擺明要話畀大家知，佢哋老友鬼鬼。
王衞內地出生，兒時來港，有香港身份證，多年來刻意保持低調，1993年成立順豐。46歲嘅佢，頭髮烏黑濃密，為人亦相當風趣幽默。
港腔普通話娛賓
佢喺台上一開口就以港腔普通話開玩笑：「今天有這麼多媒體在場，我的『低調牌坊』沒有了。」跟住又要求「媒體請不要問我家裏有多少個廁所」。回應早前有報道指佢屋企有16個廁所，妙語連珠引來哄堂大笑。
王衞跟住不停畀高帽馬化騰戴，指之前對騰訊嘅理解只有QQ，認為「是個泡沫」，10年過後，發現對方同自己差別好大，原因係對方專注內部發展以外，亦重視生態環境建設，「我在禮拜六、日會自己一個騎單車，但馬總（馬化騰）每星期六會有20、30人陪他爬山」，笑住話「10年下來，就是2,000億元（順豐市值）跟2萬億元（騰訊市值）的分別。」
兩位咁老友係有原因，皆因順豐一直使用騰訊嘅雲計算服務。講得興起，王衞又同馬化騰講「（不如）我去騰訊管管，你也來順豐」，搞到馬化騰哭笑不得。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com