金融High Tea 2017年6月21日
入摩炒作概念減
2017年06月21日
MSCI明晟公司將公佈市場分類審議結果，市場說法係早前MSCI提出「縮小版」方案，將A股納入數量從448隻減少到169隻，加上交易所取消互聯互通總額度及更新A股停牌指引，市場認為令A股加入MSCI的機會增加，不過，由於調低左入摩嘅規模，決定嘅影響都細左。
今年A股入摩嘅主題，顯然無去年炒作咁明顯，內地似乎吸取左教訓，對爭取加入指數無表現得咁肉緊，有分析話MSCI明晟提出縮小版嘅建議，主要係唔想掃大陸興，但咁做亦令入摩變成不痛不癢。
花旗私人銀行亞太區投資策略師彭程就話，即使A股納入新興市場指數，所佔權重亦降至只有0.5%，對近期的投資市場影響不大。他估計即使今年A股不被納入MSCI，影響都唔大，因為A股上月的升幅亦未反映市場對MSCI的憧憬，對港股的影響更小。
騰訊開壇股份創新高
入摩議題暫時唔係咁熱，反而兩大科網公司老闆分別出招，阿里巴巴嘅馬雲係美國大搞招聘會，為佢早前見美國總統特朗普時承諾創造100萬個職位找吓數。騰訊主席馬化騰就係香港參加一個大灣區研討會。馬化騰提出搞科技大灣區，咁樣即係打造一個好似三藩市同矽谷的高科技區，若然成事相信可令區內經濟再翻一番。
中環茶友好多都有去呢個場合，佢地講起當年馬化騰係潤訊打工，來香港出差時接觸到互聯網，啟發左佢返去搞QQ，幾年後到2004年騰訊來港上市，由掛牌至令升左350倍，當年買2、3萬元的股份，揸到今日已經過1000萬，夠錢退休啦。
當日騰訊上市，估值係18倍市盈率，據講公司管理層對呢個作價好失望，但當時投行係用雅虎作為參考。呢個參考亦提醒左馬化騰，後來見雅虎跌得咁快，知道科技公司嘅世界係好殘酷嘅，亦都令佢充滿危機感。呢樣嘢其實係投資市場都一樣，無論幾強大嘅公司，都有可能面對挑戰，特別係今日瞬息萬變嘅世界，無股份係安枕無憂嘅。
眾安圖顛覆傳統保險業
可能係馬化騰的氣場嘅關係，昨日大市雖然下跌，但騰訊逆市再創新高，一度高見283.8元，收市升幅收窄，升0.43%，收報280元，其他科網股都跟唔上。恒指收報25843，跌81點；國企指數收報10468，下滑52點，藍籌股表現較好嘅有銀河娛樂(027) 逆市創52周新高，一度高見49.2元，收市升1.57%，造48.6元；恒安國際(1044) 升1.2%，收報58.6元。昆侖能源(135) 漲1%，報收6.5元；中國聯通(762) 收升1.06%，報11.44元。
市場而家好有興趣嘅，係由「三馬」馬化騰、馬雲同馬明哲創辦的眾安保險上市。眾安保險為內地首家專以互聯網銷售保險的公司，不設任何分行，2015年曾進行A輪融資，當時估值約500億元人民幣。這次計劃未來數周入表申請在港上市，傳聞集資最高達20億美元(156億港元)，至少也有10億美元(78億港元)，有可能成為首隻金融科技股(FinTech)。對於呢隻股份，好多人磨拳擦掌，但同時都好留意佢嘅營運模式，會唔會顛覆原來的保險經營模式，對呢類股份造成衝擊。
陸羽仁
金融High Tea 舊文
來源 source: http://hdfin.stheadline.com