麗新股東要做二仔底
2017年06月22日
呢個世界總係你有預期的不會出現，沒有預期的反而會發生。好似內地A股入摩，大陸官方今年無再大鑼大鼓話有機會，最後反而有好結果，大摩MSCI明晟公佈，會將A股納入MSCI新興市場指數，涉及222隻A股大型股份，明年6月起生效。
消息公佈後，
中港兩地股市反應平靜，內地A股有升但唔算勁，港股仲向下跌左百幾點，睇佢開市即刻插低200點，令成日走勢定左好消息出貨嘅調子，似乎大戶都唔想個市造得太高。如果呢個狀況未來兩日都係咁，睇嚟之前到過嘅26063點都可能係短期高位。
入摩短線刺激唔大
MSCI係解釋決定時話，今次納入A股主要是因中港互聯互通機制發展正面，且中國交易所放寬對涉及A股的全球金融資產作預先審批的限制，為股市的准入水平帶來正面影響。A股份段入摩，同市場預期模式接近，反應普遍平靜。
上交所資本市場研究所所長施東輝，國際投資者將會更加平穩持續地投資A股市場，但不會出現爆發式的資金湧入。美銀美林就話，若A股在MSCI新興市場指數中被全面納入，所佔權重可能達到20%，代表資金總流入規模約為5700億美元，約佔A股市值的18%。以韓國和台灣的全面納入用了6至9年時間計算，由於A股規模、開放程度和資本流動限制等因素，其全面納入所需時間將更長。如假定為10年，每年潛在流入規模佔A股市值的比例將為約1.8%，實質有影響但不具決定性，相信呢個都代表左市場幾普遍嘅睇法。
內地等左咁多年，入摩終於邁開第一步，但夢想實現可能就少左幻想空間。滬深兩市早盤受消息影響雙雙高開，但隨後一度倒跌，上證指數半日收報3156，升16點；深證成指報10367，升78點；創業板指數報1824，升3點或0.2%，整體升幅溫和。
港股基本上是回吐格局，恒指全日偏軟，收報25694，跌148點；國企指數收報10393，下滑74點；紅籌指數收報3989，跌13點或0.34%，成交金額765億元。A股入摩叫做帶動券商股造好，國泰君安(2611) 創上市新高，但升幅1.3%，報收16元，力度都係麻麻；國泰君安國際(1788) 收升1.2%，報2.54元；中信證券(6030) 升0.87%，收造16.22元。
低價供股無跟蝕晒章
藍籌股表現沉悶，個別二線股就炒左上嚟，麗新系齊齊逆市炒上，麗新發展(488) 收造0.285元，升近6%最高曾升逾一成；豐德麗(571) 急漲11%，收0.96元；麗新國際(191) 升近8%，新報3.39元；麗豐(1125) 上漲6%，報0.23元。麗新系一向資產豐厚，早排中環地王以二百幾億元成交，以麗新係隔籬嘅兩幢商廈五成權益，估值粗粗地都一、二百億，單係呢件資產隨時超過成系公司市值。但關鍵係即使佢家底厚，但會唔會賣產兼益股東呢？
有中環茶友一向跟開呢系股票，佢話麗新系係二、三十年前，係最勇嘅二線地產商，當年買落嘅資產，今日都值唔少錢，三年前麗新國際曾經以25供4股嘅比例供股集資，供股價係0.834元。當時佢諗股價咁低做乜供股呢？一來公司唔係好缺錢，二來要錢的話只要賣啲資產就得，何必咁低價發股攤薄資產呢？所以佢都心郁郁想入貨供股，但最後覺得大件夾抵食嘅地產股好多，結果都係無買。
睇番而家佢股價同供股價比已經升左幾倍，小股東如果無跟就蝕晒章，若然當時做二仔底死跟，而家回報好和味，茶友當時既然無買，而家無理由高追上車啦。
陸羽仁
金融High Tea 舊文
來源 source: http://hdfin.stheadline.com