財經評論：
簡約設計慳錢為實
■簡約風格的裝修，以低成本高效益為目的。 資料圖片
地產市道當旺，裝修行業也好景，有能力置業人士，買樓後便會搞裝修，已擁有單位的業主，即使嫌樓價升得太高，財力不夠細屋換大屋，亦希望裝修盡用空間。然而，大家有否發覺很多住宅都走簡約風格，用料大同小異，講到底為慳錢。
從事設計裝修朋友說，行內整體生意的確較以前多，但競爭非常大，接到生意亦「好睇唔好食」，尤其近年細價樓上車客花大筆首期，所餘裝修費有限，新樓預算10餘萬元，舊樓全屋翻新預算20餘萬元。現時人手短缺，工資上漲，平均每位師傳日薪約1,300元，人工佔去裝修費逾五成，惟其他方面控制成本。
設計美其名簡約風格一來好聽，二來可針對客人愛靚又慳錢的心態，裝飾以低成本高效益為目的，亮點一至兩個便足夠，主要在客廳電視、梳化背後及主人房床頭造特色牆，物料以文化石、灰鏡、圖案磚及牆紙等等，加些燈光便完成，每幅特色牆約兩、三萬元，經濟實惠。
不過，為免倒模一式一樣，運用線條造型技巧，以及訂製家具款及配色花心思，務求每個家居有變化，滿足不同客人口味。要注意，裝修行業良莠不齊，客人宜揀有口碑的公司，最好有親友光顧過比較穩陣，以免遇上黑店。
按運輸及房屋局公佈數據顯示，2014年私人住宅落成量1.57萬夥，其後兩年分別有1.13萬及1.46萬夥，三年共4.16萬夥，未來三至四年潛在供應達9.6萬夥，數字非常驚人。
設計師朋友話新樓越多，行內生意越多，雖然自己賺得少，總好過冇得做，視乎有否失誤需要重造工程而定，賺取裝修費近二至三成比例作毛利，基本上夠公司營運及有少許利潤。新屋苑入夥，好彩接到3、4個單位同時開工，容易調配人手及大批買料，拉均成本，薄利多銷，密食當三番。
記者：溫潤潔
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
財經評論 舊文
來源 source: http://hk.apple.nextmedia.com