智取大市：終極一博地產股
■地產股有機會炒落後，新世界諗得過。圖為新世界總經理鄭志剛。 資料圖片
上星期五科網股突然如計時炸彈爆炸，連帶其他二三線當炒股都急回，要提防重覆3月Chok市時，熱門股接連急插調整嘅情況再出現。
之前炒到㷫烚烚，唔少人買到成手都係股，需要執倉嘅話，首先要望嚇
持有股票有冇潛力發盈喜，有嘅話不妨一留。如果手上持有嘅係績差嘅龍尾股，減倉之下可以先行沽出，費事喺盈警之下無啦啦捱一記悶棍。
炒盈喜、績優股相信依然係未來一個月不滅主題，鬥快衝完再鬥快沽。至於輪流炒嘅板塊當中，去到尾水不妨留意本地地產股，皆因7月升市炒都冇炒過，咁啱中資股party loop到七七八八，資金要搵對象就要靠消息面，下星期正值聯儲局議息，但加息、縮表係預期之中，爆出突發負面消息機會不大，落後本地地產股有藉口炒上。
雖說近期新盤銷情轉趨淡靜，但本身基本因素亦無不妥，淨係靠7月港股估值全線拉高呢個因素，已經係地產股跟機炒上嘅充分理由。選股以新世界發展（017）行先，貴為本地地產股新龍頭，次次升得快過新地（016），呢個moment博新世界一棍都相信穩陣。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com