經濟客艙：買樓收租不如買房託
■投資REITs比買磚頭更加有彈性。圖為領展與南豐合作的海濱道77號。 資料圖片
如果有500萬現金會買咩先？買樓先？買股票？定買六合彩先？女友好認真咁話：「買樓！」當時聽完我好嬲，投資物業係咪一定要買磚頭。我於是好認真咁講：「我覺得
係可以買REITs喎。」
美國今次加息周期加咗4次息，香港樓價仍然「堅離地」。揸住5球亦買唔到合心意嘅單位屬尋常事。做業主係好威，完成人生重要嘅目標。不過，毋須要俾做主業嘅虛榮感掩蓋。買REITs某程度上，身份上都可以叫業主。最重要唔駛畀差餉、唔駛夾管理費又唔駛應酬租客，穩陣賺息。
女友皺皺眉頭：「但係……」美國已經進入加息，就算7月唔加息，9月又加、12月再加，相信今年美國加息六次，樓市照樣升。睇嚇領展（823）嘅走勢貼住恒指走。領展預測派息率為3.78厘，望落唔算吸引。不過，買樓收租都係兩厘半，仲未計差餉雜費等。仲有唔好唔記得，我哋買股收息係唔駛畀稅。如果為咗買樓而買樓，淨係計果啲辣招稅，真係頭都大埋。睇嚇股神最近都大手入股Store Capital，預測派息率近5厘，仲要係人哋REITs揀樓盤，定必係升值潛力十足嘅筍盤啦，眼光點好過我揀嘅盤。
我以為自己已經深入淺出咁表達咗諗法，點知女友話：「講咁多，不如你中咗六合彩先再講啦。」
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com