【實力取勝】書展大成功（陳承龍）（第135期）
2017-7-27 17:00:35
截稿嘅呢一刻，書展已經曲終人散，今年《策略王》書展嘅物資亦都已經運咗返柴灣總部，叫做完滿結束。
大家容許小弟喺度自我吹捧一陣，因為今年《策略王》嘅書展的確係好成功，可以話喺坊間一片紙媒已死嘅聲
音中嘅清泉，《策略王》有能力帶領紙媒從谷底中反彈。
幾樣明顯喺書展見到就係，好多支持者特登走去書展話「社長，特登嚟書展支持你」，然後就訂閱一年雜誌，呢個可以話係紙媒嘅新模式，全靠《策略王》係咁喺網上做直播，更多人認識《策略王》呢個品牌，佢哋可能聽我嘅節目賺到錢（絕大部份都話買咗滙豐輪），有個讀者仲話賺咗三球，於是落嚟支持訂書；亦有更多嘅讀者話睇慣咗，上咗癮，於是又嚟訂書。小弟估計，依家已經係網上帶動實體嘅年代，啲人上網睇咗你嘅嘢，覺得你有道理，於是就買書睇，買完又覺得好睇，就成為咗忠實讀者。
根據小弟目測訂書生意好明顯好過上年，所以進軍數碼互動媒體係正確嘅！同時小弟都想同訂咗書嘅讀者分享一個好消息，就係《策略王》至少有99%機會，喺書展之後加價，意味住用折扣價訂咗書嘅讀者即贏錢，至少都贏個彩數，對於炒股嘅人好重要架！當然，加價議案仲要經董事會同埋由專業人士組成嘅獨立刊價委員會批准至得，但都好大機會過。
今年另一重點就係圖太郎本書，小弟可以話，幾乎賣曬。亦都係證明我哋喺財經上面有優勢，好多讀者都信我哋嘅分析，願意睇我哋節目，亦都順勢買埋圖太郎嘅《圖表實戰》學習我哋點樣分析股票。有嘅讀者又有好消息，就係第一版賣清，要加印需時，發行運入書局又係需時，所以買咗《圖表實戰》嘅朋友又有得搶先睇。
有咁嘅業績，小弟下年肯定會再參加書展，而且出年出嘅書會更集中喺財經書入面，圖太郎本書有咗個底，出年自然可以出更新版；小弟都構思緊出本炒股、健身同享受人生嘅手記；高明都會出本投資書；亦都開始逼其他同事有冇其他意見，下次會議一次講出嚟。講真，今年書展台前表現完美，其實幕後仲有好多進步空間，例如提早準備，講個秘密畀大家聽，今年好多書都係僅僅出得切，有今年成功經驗，下年可以更早準備，即是下年書展出嘅新書，依家要開始寫。
星期二滙控（00005.HK）爆一棍勁，都要交代嚇，以下轉述我的基金經理朋友留言。
滙豐下星期一出什麼業績冇人會知。回購或不回購股票也冇人知。但有人已經開始挾上去。試想你是空了貨的大淡友，或是冇貨嘅基金經理，見到股價咁升，有三個選擇：一個是死忍，唔補倉，等下星期一看看開大或開細才決定。另一個就是本著「執輸行頭，慘過敗家」的心態，君子不吃眼前虧，現在補了空倉先算。第三種就是唔信會開大但是焗著去補，因為給人call 空倉孖展，或者已輸了太多迫住要壯士斷臂。又或者冇貨的基金經理焗住買貨，不然跑輸行家就被抄魷。
相信多數是第二或第三種，但問題是，有二百億股的滙豐流通量不多，星期二升超過2%只得三千幾萬股成交，太怪了。答案很簡單，是貨源歸了邊。試問你是第一種，會激到嘔血，這幾晚瞓唔著，遲早會變成第二和第三種。當這個惡性循環開始時，就是我幾星期前已經說過的：滙豐會被「挾爆」。
實力取勝 - 陳承龍 舊文
來源 source: http://www.winmoney.hk