恒大碧桂園競爭輝
2017年07月28日
美國聯邦儲備局結束兩日會議，利率動向同市場預期一致，暫時按兵不動，但出嚟調子較為溫和，特別係對通脹預測偏向樂觀，令市場對加息速度放心左。美股乘勢造好之餘，港股初段雖然高開，反應唔算太大，但到左中午升幅開始擴大，部份相信係因為有大戶搞起氣氛。
聯儲局會後發表聲明，當中提及12個月通脹率指標都下滑，變相話今年以來通脹疲軟已成為較持久現象。第二是將「縮表政策段落」內「今年」開啟縮表的時間，改為「相對迅速」地縮表，市場預計聯儲局9月會議將宣佈縮表。
耶倫有機續任吹鴿風
央行通脹講法偏鴿，令利率期貨反映12月再加息概率約為49.1%，年內只會加息三次而不是四次機率，較一個月前大幅上升。聲明發佈後，美股三大指數一度收窄日內漲幅，不過五分鐘後開始反彈。結果杜指升左97點，收報21711點，美元指數迅速回落0.4%，跌破94點關口。
除左會後聲明，總統特朗普放風聲話有可能繼續委任耶倫做聯儲局主席，相信都有利市場氣氛。耶倫畀市場印象偏鴿，傾向保持經濟增長。
特朗普喺選舉時曾經開到口話唔like佢，但佢上任搵人唔易，耶倫做央行行長力撐股市同經濟，相信都啱特朗普口味，所以佢口氣有啲鬆動。耶倫如果留任，咁佢處理縮表同加息嘅彈性大左，變相都令息口去向變軟啲。
喺外圍吹暖風下，大市再創近兩年高位。恒指最多升228點，高見27169，再創逾兩年新高，恒指收報27131，升190點；國企指數收報10858，漲26點，成交金額900億元。藍籌股騰訊及友邦齊齊創新高，騰訊曾高見308.6元，收報308.4元，升2.5%，市值逼近3萬億元水平；友邦破關收報60.7元，升1.8%，兩股合共為恒指貢獻111點。港交所(388) 受惠成交增加，跑贏大市升2.2%，報223.6元；市場憧憬領展(823) 有機會出售資產或分拆資產上市，股價漲2.9%，報62.75元。
雖然指數高收，但唔係乜股都升。除左騰訊(700) 升不停外，今個星期做晒主角嘅恒大(3333) 再大力夾上。
佢股價喺朝早已經炒高，連同其他內房股好似融創、碧桂園紛紛造好，之後恒大借住上半年淨利潤係對上一年3倍嘅好消息愈夾愈高，終於夾上23.8元，狂升左2.9元，升咗成13%，單日市值暴漲382億元。睇番今年第一季尾，恒大股價仲喺6元樓下浮沉，半年唔夠差唔多升左3倍，一個星期就升左37%。
恒大急升帶動內房成個板塊，搞完大刁嘅融創中國(1918) 再升7%，報20.8元，另一隻大股碧桂園(2007) 升6.7%，報10.52元。
內房股你追我趕
中環茶友話，內房股競爭輝，恒大走勢明顯有夾倉味，皆因貨比貨，好多人會將恒大同碧桂園比，兩者都係走大眾化市場，一味貨如輪轉，兩者去年都係前三甲位置，今年再拼個高下。但講升幅，年初就碧桂園勁，但第三季開始恒大就贏到開巷，若然只係計數，咁碧桂園就抵買啲，但夾倉股可以升得好狼，其他股份都唔會有咁激。
恒大、碧桂園孖住升，成為兩個火車頭，其他內房就喺後面跟，華潤置地(1109) 升4%，報25.35元，但已經夠做表現最佳藍籌股。其他好似遠洋集團(3377) 升7.5%，報4.47元；龍湖地產(960) 升5.7%，報19.92元；百仕達(1168) 升5.9%，報1.08元；世房(813) 升5.5%，報15.66元；中海外(688) 升2.3%，報26.65元，升得相當和味。
陸羽仁
金融High Tea 舊文
來源 source: http://hdfin.stheadline.com