操盤手劄記：換入防守性股份
■嘉利主業係產銷電腦伺服器外殼，喺國際市場佔有率為10%。 互聯網圖片
朝鮮半島局勢緩和，環球股市鬆一口氣。港股繼續炒業績股，內銀周五起陸續派成績表，加上內地走資壓力紓緩，降準憧憬重燃，內銀成為大市火車頭。恒指昨收27409，升234點或0.86%，仍
受制10天線；主板成交818億元，比上日少13%，顯動力不足。
近排嘅地緣政治危機，除咗美朝半島對峙，仲有中印邊境對陣。話時話，第二次世界大戰1945年結束，目前各國元首都係戰後世代，特朗普1946年出生，普京、文在寅、習近平、默克爾、安倍晉三、文翠珊係50後，馬克龍係70後，金正恩更加係80後……統統未試過打仗，邊個膽敢開第一槍？
我相信美朝、中印暫時唔會開戰，因為開戰對各方以致盟友嚟講，都唔符合成本效益，所以大口普同肥仔奀（Un）鬥拋，只係流於口水戰。對市場嚟講，口水戰只係噪音，最緊要係對經濟有冇影響，反而中美貿易戰更著邊際，雖然調查中國有冇侵權盜版起碼需時一年。
不過，始終軍事對抗、貿易衝突緩而未解，正路係當大市整固時換入防守性強嘅股票，例如有盈利同派息支持、累積升幅又唔大嘅股票，我近日就留意到嘉利國際（1050）。嘉利主業係產銷電腦伺服器外殼，喺國際市場佔有率為10%，主要客戶包括HP、IBM、聯想（992）。
嘉利雖然有美國客戶，但產品唔係直接輸美，而係先賣去歐洲，就算美國提高關稅，打貿易戰，影響都唔大。此外，集團又利用機械人技術，開始接電子消費產品訂單，頭炮係監控病人食藥嘅醫療產品。
集團亦有發展房地產業務，目前喺深圳毗鄰鳳崗有3個項目，大老闆注入嘅服務式住宅就快賣曬；佔一半權益嘅屋苑下季開售；另有一個舊廠亦將改建屋苑。隨著房地產收入陸續入賬，未來幾年盈利可望維持高增長。該股近月高位回落，每當跌穿1.2元，集團就會出手回購。該股現價1.16元，市盈率13.8倍，股息率5.6厘，具吸引力。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com