金融High Tea 2017年8月17日
炒手機股要睇住蘋果
2017年08月17日
科網股呢排出現兩個不同走勢，一個係以騰訊(700) 為首嘅內地科網板塊，包括幾隻手遊股，佢地呢排股價唔係咁精神，升起上來都唔係咁「給力」，除左因為佢地過去升得多外，主要係喺中共十九大前，市場估計內地會加強對網絡資訊嘅監管，對騰訊呢類科網股不利。
接單細佬估值貴過大佬
另一類走勢明顯好啲係手機設備股，嚴格嚟講佢地唔係科網，性質近硬件生產商多啲，過去曾經因為淡友沽空大股瑞聲科技(2018) ，成個板塊急插，但隨住沽空壓力消退，佢地快速回升，一路新興異軍係以做指紋模組跑出嘅丘鈦科技(1478) ，佢股價係宣佈理想業績後急升近五成。
手機設備股嘅炒風，源頭始終嚟自蘋果。蘋果即將推出新款手機吸引市場好大憧憬，連股神巴菲特都喺新產品推出前加碼。陸羽仁聽聞有幫蘋果做生產嘅大廠講，新產品意念唔錯，所以佢地都有信心推出時可以大賣。蘋果過去兩年嚴格嚟講無推出創新型號，果迷餓機好耐，加埋有啲創新意念，估計新機一出必然爆紅。
蘋果股價呢個星期衝返上160美元樓上，挑戰162.2嘅高位，幾隻手機設備股走勢其實幾相似，當中只有丘鈦因為上市時間短，爆發力未完全發掘，故可以率先創出歷史新高，其他都係跟跑，丘鈦收報15.28元，再升4.2%，市盈率74.5倍。舜宇光學(2382) 就收報110.2元，升5%，市盈率83.9倍。
瑞聲科技開始升近上次畀人狙擊嘅水平，收報115.2元，倒跌0.5%，市盈率31.5倍，近期算比較乏力。要留意嘅係蘋果雖然係領軍嘅龍頭，但佢依家市盈率仲係低於20倍，低過接佢單嘅手機設備股。
蘋果新機市場概念咁勁，點解佢嘅估值唔係咁高呢？有中環茶友覺得，主要係大家覺得手機市場逐漸成熟，消費者願意花喺買手機嘅錢大致係咁上下，未來盈利上升空間受限，所以佢嘅估值唔可以有太高溢價。
從呢個角度睇，炒作本地嘅手機設備股，最好留意住蘋果動向，若然蘋果轉勢，咁大家就要跳車。
同一時間，仲要睇番呢啲股價嘅估值，若然接佢嘅單，估值又高一截，好似舜宇炒染藍，市盈飆近84倍，咁跟紅頂白炒炒之餘都要時時記住防範風險囉，呢啲股都係跟風走一轉。
美朝口角威脅繼續淡化，港股再彈，恒指收報27409，升234點；國企指數收報10817，上揚79點，成交金額817.億元。
騰訊撐場升左1.4%，收報323.2元，大市繼續追捧內銀股，建行(939) 上揚2.2%，收報6.66元；工行(1398) 升1.8%。
最後講兩句國泰航空(293) ，佢宣佈上半年業績由盈轉虧，蝕左20.51億元；每股虧損52.1仙，無息派，股價收報11.7元，升0.1元。
公司去年同期錄盈利3.53億元，全年都要見紅，所以今年前景都幾艱難。期內公司收入458.58億元，按年微升0.4%。不過乘客收益率下跌5.2%至51.5仙，反映所有等級客艙均競爭激烈，及以其他貨幣賺取嘅收益面對港元走強嘅不利影響。
國泰肥佬仲有排捱
呢兩年，陸羽仁一直唔睇好國泰業績，反而對佢今次嘅成績表唔太意外，甚至覺得管理層已經好辛苦去做。
去年國泰業績肥佬，好多人將矛頭指向燃油對沖合約，其實真正攞命係多左好多航空公司加入爭生意，呢樣先係最危險嘅威脅，管理層今次坦言市場結構已經改變，o依家國泰必須要做大手術先有可能扭轉形勢，但恐怕過程會好痛苦，想做股東就真係要極大忍受力，買之前要問多幾次頂得順先好。
陸羽仁
金融High Tea 舊文
來源 source: http://hdfin.stheadline.com