中環在線 - 李華華 2017年8月17日
中環在線：周凱旋掃愛馬仕送禮
■周凱旋（圓圖）噚日自己一個人喺愛馬仕慢慢睇。方楚茵攝
金鐘太古廣場（PP）向來多名人闊太shopping，華華噚日因為工作行經愛馬仕（Hermès），發現有兩名型仔保鑣哥哥喺愛馬仕門外，肯肯定係等緊老闆濕平喇。佢哋老闆竟然係超人李嘉誠嘅紅顏知己周凱旋。
呢日食完晏，下晝兩點左右，周凱旋自己一個人喺愛馬仕行來行去，好隨意咁睇，唔似好有目標，同時間都有唔少阿太喺度周圍睇，周凱旋都冇乜避忌，同店員有傾有講，冇耍大牌，最後買咗一袋戰利品離開。
展示一身低調打扮
眾所周知，愛馬仕係華置（127）前主席劉鑾雄（大劉）嘅愛牌，華華上前去問周凱旋喺咪粉絲，周凱旋即刻耍手擰頭，話只係幫人買禮物，隨即打開個袋show畀華華睇，指份份禮物都貼曬label，記低顏色，以證明係送禮之用。佢仲企定定一下，做手勢掃一掃自己全身，意指佢一身都冇乜行頭，證明堅唔係自用嘅。
其實大家都知周凱旋向來低調，不時以修身黑、灰套裝示人，一頭短捲髮配貝殼形耳環就係佢嘅標誌。喺黑衣人眾多嘅PP，真係撞到都未必認得，都話佢係漆黑中嘅螢火蟲㗎喇。
最後，周凱旋跟華華講拜拜，就會合門口兩名外籍保鑣哥哥走人了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com