中環在線：任總《觀點》周四重出江湖
■任志剛
登登登凳，金管局前總裁任志剛嘅網誌《觀點》將於本周四重出江湖！
近年越來越多政府高官寫網誌同市民溝通，唔講唔知，任總應該係第一位寫網誌嘅官員。想當年，1998年發生亞洲金融風暴，政府入市擊退大鱷，任總翌年就開始透過金管局網頁寫網誌，名為《
觀點》，希望透過網誌增加金管局透明度，順便解釋普通市民難明到嘔嘅金融政策。
CY做特首時停產
任總都好勤力，每星期出一篇《觀點》，直到2009年退休離開金管局，佢就改以個人網誌形式寫文章，不過數量銳減，2012年打後、CY任特首呢5年，佢直情連影都冇。另一邊廂，陳德霖掌舵後，金管局就將《觀點》改名，做叫《匯思》，由以往一星期一篇，變為不定期刊登，文章內容都係解釋金融政策之類。
時移世易，任總幫林鄭月娥助選成功，並成為特首林鄭嘅金融政策「四大支柱」之一，家陣擔任行政會議成員，忽然間又再思如泉湧，《觀點》都要重出江湖。
任總本周四將會透過個人網誌刊登《觀點》文章，據講，佢係希望藉此集思廣益，就本港經濟同金融發展提出最新觀點。
雖然話今時今日人人都可以透過網上平台發表意見，不過任總不是誰人，即使退休多年，說話仍然舉足輕重，唔知佢嘅「觀點」會唔會畀人有「影子金管局」嘅感覺呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com