大棋局：迷失世代在眼前
■2013年《經濟學人》的封面故事，是否暗喻中國正由盛轉衰？ 互聯網圖片
中國是否在重蹈80年代末日本覆轍？近日《明鏡網》透露，海航集團已被當局列入「金融反腐」調查名單中，連同安邦保險、明天系、大連萬達、上海復星，五大集團的海外併購相繼受限。
就喺呢個時候，復星郭廣昌發文《走出去是為了更好的回來》，國務院新聞辦公室亦發佈商務部報告《上半年對外經貿運行良好非理性對外投資得到有效遏制》，三者相映成趣。
日本經濟迷失三十年，但有一個事實不能忘記，就係日本地產神話爆破後，自1991年起計，日本持有嘅海外資產從來都係世界第一。據日本財務省統計，2016年底日本持有嘅海外資產淨值達到349萬億日圓，連續26年，連第二都未試過。錢太多出去買嘢好正路，但要睇手段同時候。80年代正值日本炒樓狂潮，大企業如同今日嘅中國不斷海外併購。然而當日本地產神話爆破後，出咗去嘅錢唔會返嚟，造成資產在外，負債在內，係日本經濟一沉不起嘅重要原因。
中國正處於人民幣轉型期，若人民幣想脫離以外滙為發行基礎，人民幣真正值咩價，要等市場釐定。正因為呢種不確定性以及各種政治因素，有錢佬未出發先興奮，都係走先。於是形成一種現象，就係過去幾年叫人愛國嘅真正含意，係我可以走，你唔好走。叫人愛國者走得最快，真正想愛國的或受牢獄之災。
2013年《經濟學人》有一期封面係習近平著住龍袍，大題《Let"s party like it"s1793》。1793年馬戛爾尼訪華，兩年後乾隆駕崩，清朝由盛轉衰；另一邊廂歐洲則正經歷法國大革命。《經濟學人》似乎暗喻中國正由盛轉衰，誠然，如果中國重蹈日本覆轍，迷失世代近在眼前。
近年各種收緊政策出台，即想將局勢箍緊。高壓容易，引導困難，人人明白。當見到凡事想以高壓了斷，其實反映已經冇時間或冇計。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com