和電食快餐
2017年08月01日
港股上周五回一回，昨日再升過。恒指臨尾想回落，但大戶唔俾佢落，結果扯到上全日最高位收市。
拆息升上九年高位
大市昨日焦點係滙控(005) 公佈業績，佢今年6月底止半年列帳基準除稅前利潤上升至102億美元，較2016年上半年增長5%。經調整除
稅前利潤為120億美元，較2016年上半年增加13億美元，增幅為12%。不過，市場最關心係回購安排，銀行係期內一級資本比率超過14%，喺大把銀彈下，宣佈再拆20億美元回購，消息公佈令滙控股價再彈上一年新高，收升2.6%，收報78.45元；在倫敦開市後更升逾3%。
高盛發表報告，話佢核心稅前盈利較該行及市場預測高，主要因收入較預期強勁，資產負債表擴張較大，喺資本市場表現較同業好，信貸表現亦較佳；至於下半年回購20億美元股份，則較該行預測25億美元為低。高盛將滙控2017至2020年每股盈利預測上調4%至5%，最新目標價81元。
滙控係市場焦點，但同系嘅恒生銀行(011) 都值得一講，恒生上半年股東應佔溢利98.38億元，按年增長23%。摩根士丹利睇完成績表，話恒生上半年淨利息收入按年增長8%，略較該行預期高1%；非利息收入強勁，所以都俾個like，認為值得增持。恒生收升1.25%，報170元。
恒指昨日急升，收報27323，升左344點；國企指數收報10827，漲71點，升幅明顯落後。以整個7月計，恒指累積上升1559點或6.05%；國指累積漲462點或4.46%。恒指跑贏咁多，主要都仲係幾隻大股升得多，除左大笨象，騰訊控股(700) 都創新高見過314.4元，收報313.4元，升2.8%，幅度仲大過滙控；另一隻金融股友邦保險(1299) 急漲3.45%，收報61.55元。滙控、騰訊及友邦三股合共推升恒指236點，要留意嘅係，財資市場公會資料顯示，港元隔夜銀行同業拆息(HIBOR)升上左0.7141厘，為2008年以來高位，較上周五升0.6厘；一星期及兩星期拆息分別升至0.3064厘及0.3404厘，拆息上升相信同港息低於美息有關，如果息口繼續抽高，有可能成為大市借勢調整嘅藉口。
大股之外，宣佈賣產嘅和電香港(215) 昨日開市升上最高3.22元，之後就有獲利盤湧現，跌番去3元收市，升左6.8%，和記以144.97億元將旗下固網電訊業務和記環球電訊(HGC)的全部股權出售，呢個價遠超市場預期的117億元，佢收市市值係144.6億元，即係仲低過賣產嘅價錢，而家買佢變成流動業務係附送，就算話好消息出貨，呢個情況都係少見。
市值低過套現金額
點解和電會出現咁「抵買」嘅狀況呢？中環茶友有兩個解釋，一係因為佢由低位急升，好多買盤都係炒佢沽售固網，而家好消息成真，咁呢啲短線資金就趁佢係近期高位食胡。由於佢借住賣產消息由低位炒上最高升左近三成，食快餐相當和味，係而家咁嘅市短線資金都係先賺為敬，計左數可以再炒第二隻。
另一個理由，係和電今次套現大O舊錢後，無講話會派特別息。按照牌面計，和電若然無派息益股東嘅安排，咁賺完一次後，佢單靠餘下嘅流動網絡，市盈率會急升到4、50倍都唔奇，如果佢用啲錢嚟買嘢，咁就要睇佢係咪買到筍嘢，喺前景未明朗前，股價同資產有折讓就唔出奇，既然有賺就不如先沽左佢，等佢回調再慢慢買番未遲，所以先至會出現市值低過套現金額嘅「筍價」。茶友話，和電賣產成交後，短期高潮已過，下一輪就要等佢有動作，例如啲資金會唔會派啲特別息，或者業務會點樣重整，如果想食第二輪，可能就要等佢燉番一輪先有味道嘞。
陸羽仁
金融High Tea 舊文
來源 source: http://hdfin.stheadline.com