金手指：彩星玩具有前景
■彩星兩個月前開始出貨嘅Ben10玩具，開始出現賣斷市現象。 互聯網圖片
我多次叫「不問價追」嘅彩星玩具（869），出咗中期業績，營業額按年跌四成半，盈利則跌六成。噚日開市，即裂口低開，不過收市倒升，出支靚陽燭。
點解？其實最主要係舊年第一季，彩星玩具之前近乎
唯一玩具忍者龜有荷里活電影上畫，令舊年第一季盈利佔全年盈利六成半。睇埋舊年全年業績，忍者龜，玩完。所以今年第一季彩星玩具要順理成章出盈警，第一季營業額跌六成，盈利跌九成。
不過，第二季雖營業額按年跌近三成，不過盈利反升四成，主要原因係忍者龜去到舊年已靠廣告監粗谷銷售，不過今年火車頭玩具Voltron「百獸王」則靠卡通fans自發去買，公司廣告使費大減，令毛利率爆升。最勁係連彩星玩具兩個月前先開始出貨嘅Ben10玩具，都開始呈現今年初「百獸王」賣斷市、現炒價嘅現象。今年，我將預期彩星玩具喺冇電影下（甚至冇龜用下），第二、三、四季盈利不但按年會大升，全年盈利有望贏舊年。喺咁嘅情況下，之前每份業績都插一下落，會變成出親都升。
而因睇落公司對十億現金覺得夠，呢間現金流頗強嘅公司，將來盈利派息比率將會維持喺近百分百，即全年派息七至八厘。亦因證明不再靠一隻玩具定輸贏，變成安全好多嘅多頭馬車，市盈率亦有望上升。
呢間簡單易明，冇負債，有十億現金，市值得16億，定期回購，每年將會至少穩賺兼派一億嘅公司，邊到搵呀？買咗今年睇佢慢慢每日升幾格，到舊年高位兩蚊，比噚日收市要升5成。真係諗起都興奮。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com