實力取勝 - 陳承龍 2017年8月4日
【實力取勝】滙控至少100蚊（陳承龍）（第136期）
2017-8-3 19:00:11
滙控（00005.HK）出業績之後，小弟好似成為咗滙控代言人，唔少傳媒同讀者都打嚟問小弟意見，特別係我舊舖《蘋果日報》財經版都有記者嚟搵我做訪問，喺度多謝大家厚愛，希望啲貼士幫到咁多人賺錢啦。
滙控中期業績表現優於市場預期，上季列帳基準除稅前利潤近53億美元，按年增長46%，派息0.1美元。集團同時宣布將回購20億美元股份。回購幅度大致符預期，不過預期係15億美元至40億美元，所以個範圍都真係大咗少少。而回購幅度係先前兩次回購嘅中間，兩次分別回購25億同10億美元。
小弟覺得重點係，行政總裁歐智華話，回購會變成有效管理資本的常用「工具包」之一，未來亦會繼續審視有關因素而決定進一步的回購行動。歐智華又話，集團會考慮其他投資機會及回報，強調已預留足夠資本後才選擇回購。即係未來幾年，滙控會繼續有強大買盤，而其中一個買主，就係滙控自己。
高盛估計滙控出年回購金額為30億美元，投資評級「買入」，目標價81元。其實小弟覺得，81蚊實在太保守，恒常回購買盤係一個因素，更厲害嘅係憧憬，市場將會對回購越睇越大，越有fantasy，股價未必即刻爆上，但肯定冇基金敢沽貨。
近期滙控仲有「東風」，就係一班死性不改嘅「精仔」淡友，成日估頂搵位沽滙控，你睇下個沽空比率，業績前7月28日沽空比率19.29%，7月31日業績日，沽空滙控比率達16.44%，8月1日18.47%，留意業績日沽空金額達8.92億元，翌日再升穿79蚊已經即挾班淡友。
啲淡倉咁儲法，變相令滙控好友有交易對手，每日挾佢啲，逼佢平倉，但你一逼佢平倉，就有挾淡倉炒爆風險，好淡一齊買升得仲勁，所以淡友現時只能加倉睇淡，直到最後一刻頂唔順時，滙控股價就高唱入雲，大家就會覺得滙控終於做返大笨象，多年當愛股咁放喺床下底嘅老股民隨時加入戰團再買。當然唔使講，北水同基金其實依家已經掃緊，講過太多次，費時嘥口水。所以小弟覺得高盛太保守，今轉滙控唔係見唔到紅底嚇嘛？
另一隻近期小弟愛股就係中行（03988.HK），想寫之際編輯提醒「今期要睇住」已經寫咗，所以唔重覆，而「今期要睇住」內容小弟完全同意，希望小弟嘅fans都揭去睇嚇支持嚇其他同事。
另外，我哋《策略王直播室》喺紅隧九龍入口同紅隧香港出口都掛咗廣告banner，得閒經開去望嚇啦！
實力取勝 - 陳承龍 舊文
來源 source: http://www.winmoney.hk