十年一劫唔易避
2017年08月07日
港股衝上兩萬七千點後，有啲畏高症，成交兩日過千億元後縮番。中美股炒業績高處未算高，陸羽仁早前係政經猛人飯聚，講起股市點睇，猛人話大市雖然睇落無大壞，但逢十有災呢樣嘢始終不可不妨。
大漲小回計數未算貴
港股呢排大漲小回，中環飯局當然講吓投
資買股，猛人講起早兩年係珠三角買樓，現在食正大灣區概念。佢笑晒口話o依家升浪初起，有貨最緊要坐住，估計仲會有得升喎。
猛人咁睇好大灣區，對經濟前景似乎好有信心，咁股市又點睇呢？佢話十年前恒指都升過去三萬二，o依家兩萬七都唔係咁高唧，照睇市底唔係咁差，相信都無乜大壞嘅。座中有茶友近排係股市執到多少，即刻面露喜色，問佢有乜好買？點知猛人話鋒一轉，話大壞雖然無，但股市十年一劫不能不防，睇返八七年爆股災、九七年爆亞洲金融風暴，零七爆次按危機，一時係先露苗頭，翌年再插得深啲，但十年一劫好難走得甩，所以都唔可以太勇。
地緣風險不斷攀升
猛人經歷多番政經風浪，自然識得戴鋼盔兼行騎樓底，綜合佢嘅講法，即係股市可以玩吓，但就不宜瞓身，尺度係要睇自己嘅持貨能力，按照佢嘅講法，個市唔算太高，但唔排除插一插，咁即係個市跌完唔會散，但若然你揸貨太重，一震就要斬，或者嚇到低位沽貨，咁就無得玩啦。睇番o依家地緣政治日益緊張，北韓係核問題上玩火，搞到中美關係都緊張埋，呢啲風險因素最難睇，所以猛人提醒大家十年一劫，都唔係危言聳聽㗎。
港股去到高位好多人有戒心，所以大市上周去到尾段都有啲好淡爭持，最終收報27562，周五牛皮下雖然只係升咗31點，但以全周計恒指就累升583點，而且係連續第4周上揚；國指累積上漲247點。港股今年以來已連升7個月，市場關注8月能否持續升勢，在2007年曾有連升8個月記錄。
係o依家個市去到高位又唔肯跌嘅狀況，唔想加碼又唔想錯過升浪，最多係玩吓換馬，繼續係市場尋吓寶。大灣區概念呢排炒炒吓，上星期尾隻深圳國際(0152) 突然飊上1元，報收14.1元。深圳國際最煞食係前海嘅五塊土地，面積合共約38萬平方米。聽聞前海早年發展緩慢，無乜動靜，但呢兩年大力加快批地，o依家可用土地開始緊張，令到深國議價條件大增。深國市值只係264億元，如果講秤身家佢都相當厚。
太平地氈一句到尾
上周另一雙爆升股份係太平地氈(146) ，公司宣佈向獨立第三方出售商業品牌業務，包括公司商業地氈製造、分銷及銷售，現金代價9400萬美元(約7.28億港元)，預計出售實現收益約3.67億港元。最筍係佢建議分派特別現金股息3.61億元，預計每股為1.7元，將以出售所得淨額其中約50%支付。消息一出股價即時爆升太平地氈股價飆升55%，收造3.63元。太平地氈前收市報2.35元，套現金額超過公司市值之餘，公司仲肯大派股息，小股東自然開心。呢間公司過去賺錢唔多，但勝在資產豐厚，若然賣嘢必然派錢，公司三月份公佈業績時講咗句，「正在對商業品牌業務進行戰略審查，以期為股東實現價值最大化。」跟住佢就出手，咁做都算對得住長期支持嘅小股東啦。
樓盤泳池加激流 煇少度橋最緊要受
深圳有景，搞到o依家新界賣樓都SELL吓邊境概念。新地有個大盤係元朗叫PARK YOHO，據聞有成二千幾伙，早排有茶友入咗去實地參觀，睇介紹都猛睇距離深圳福田有幾近，可見深圳真係今時唔同往日。
新地樓其中煞食點之一係會所，茶友睇呢個盤，最有印象都係呢樣嘢，佢個會所除咗有室內游泳池，仲學咗馬會會所嘅招數，整咗個人工激流畀小朋友玩，據聞呢樣嘢係執行董事郭基煇度出嚟。連大眾化樓盤都有咁設施，茶友話馬會嘅新大樓，真係要諗多啲「花臣」先得。事實上，聽聞馬會o依家都好留意外面嘅動靜，所以佢哋會所嘅設計，o依家都當係軍事秘密，唔會輕易外露喎。
幾千萬搞濕地「示範單位」
既然會所咁殺食，所以新地都食到盡，會安排睇現樓嘅買家欣賞吓外籍美女水中起舞；不過，呢啲嘢只係點綴，有就多個話題啫。新地呢個盤本身係農地改用途，為咗減低環保人士嘅意見，佢哋都整咗個換地保育的濕地私家花園。為了搞呢樣嘢，集團都用咗二千幾萬，係清理棄置物後再疏濬水道，引入河水，回復原有生態。o依家呢度一種有價植生態物種是外號「四戙」的廣瀨妹蟌，呢種蜻蜓以身體圖案似麻將牌而得名。新地o依家揸住成二千萬呎農地，若然有一半可以發展，都已經好襟計，所以擲呢幾千萬整個「示範單位」，真正係小財唔出、大財唔入。
陸羽仁
陸羽仁周記 - 陸羽仁 舊文
來源 source: http://hdfin.stheadline.com