資產股無搞作好易炒完
2017年08月07日
近排潮流興炒資產股，特別係一啲有可能賣產或收購嘅資產股，例如大酒店(045) 就係一個好例子。今年七月曾經炒高至17.12元，差唔多較佢正常價九蚊高出一倍，不過最近有降溫跡象。
大酒店上周五公佈半年業績，上半年純利5.2億元，按年升162
%，撇除物業重估收益及其他非經常性項目，基本盈利增加19%至1.8億元，派中期息4仙。今年上半年大酒店營業額26億元，按年跌0.4%，現金收益EBITA升7%至5.6億元。期內香港半島酒店出租率升4.5%，但房租平均收入跌咗2%，集團希望下半年可以提高房租。
股東主要關注嘅唔係大酒店嘅業績，而係會唔會畀人收購嘅消息。之前大酒店股價急升，同新加坡商人蔡華波六月底起大幅增持大酒店有關。消息令大酒店由11元起步急速炒上，最高炒至17元樓上，大家都關注蔡華波係咪想敵意收購大酒店。除咗蔡華波之外，信置(083) 主席黃志祥旗下嘅信和酒店(1221) ，今年五月增持大酒店至5%以上嘅需要披露水平，令人關心呢啲大孖沙收集大酒店股份有冇後續動作。
蔡華波無意入局
上周五大酒店管理層喺業績會上透露咗蔡華波入股嘅最新消息。大酒店董事總經理郭敬文喺業績會上表示，董事會至今冇主動聯絡蔡華波，蔡華波增持大酒店股份至11.8%之後，曾經寫信畀大酒店，表達增持純屬財務投資，並非惡意收購，亦冇要求進入董事局。
郭敬文形容蔡華波嘅來信只有短短兩三句說話。當記者問到大酒店董事局係咪好被動，郭敬文話，作為一家上市公司，人人都可以買大酒店股份，無需要主動，佢哋都冇需要主動聯絡每一位投資者。再被追問擔唔擔心蔡華波會聯同其他人提出收購大酒店，郭敬文笑着回答，「如果樣樣都擔心，我會甩晒啲頭髮。」他強調，大酒店股東米高嘉道理家族持有大酒店超過50%股權，持股超過100年，屬於長期投資，不會改變。
看來郭敬文是有意披露蔡華波嘅信件，向外澄清蔡華波並非敵意收購大酒店，甚至沒有要求加入董事局，換言之只係被動投資。
呢個消息對大酒店嘅管理層係好事，因為搞出一啲不知名嘅第三方加入董事局，對管理層相當煩惱，要應酬舊老闆之餘，又要應酬街外老闆。如今對方表示無意入局，買幾多公司股份都無所謂。
不過，對於買大酒店股份嘅股東而言，就要小心。擺明冇人惡意收購，就意味着冇乜炒作空間。
現喺炒資產股，主要有三個層次。第一、炒資產折讓。很多股份嘅資產折讓其實都比較大，以大酒店為例，總市值220億元，市帳率0.6倍，意味着有40%嘅資產折讓。即是說，大酒店資產淨值有367億元。大酒店其中最有價值嘅資產是尖沙咀半島酒店，喺今年6月底半島酒店估值120.6億元，早前宣佈可能會放售嘅銅鑼灣怡東酒店，號稱估值超過200億元。雖然一個喺尖沙咀，一個喺銅鑼灣，半島酒店嘅120億元嘅估值，比市場估計價格略低。郭敬文話半島屬五星級酒店，與怡東酒店嘅位置、規模、客群不同，兩者可比性低，而且集團大部份帳目一向採取審慎保守嘅策略。
資產折讓唔等於大升
無論如何，可以說大酒店有一定相當嘅資產值折讓。只是，有資產值折讓，股價是否一定大幅上升，又是另一個回事。
第二是大股東有沒有搞作。公司資產值即使有折讓，如果大股東完全沒有搞作，散戶炒其潛喺資產，炒得兩炒，如果公司沒有動作跟尾，很快便會玩完。公司最可能會做嘅動作，就是出售資產。好似鷹君(041) 旗下嘅冠君產業信託(2778) 可能出售朗豪坊辦公室大樓，市場估值近200億元。公司做出呢個動作，冠君嘅股價就會炒高。因為大家憧憬高價賣樓之後，會有比較大嘅現金分配。不過你睇大酒店，公司強調係百年產業，係嘉道理家族嘅百年投資。當中皇冠上嘅寶石，就是半島酒店。你說公司會否把半島酒店賣掉，拆卸重建呢？恐怕有人出到200億元買半島酒店，嘉道理家族都不願意出售。既然如此，就好難說半島酒店現喺嘅市場估值高，公司估值低，就走去炒大酒店嘅股份。
第三是敵意收購。最容易炒高公司股價嘅是有第三方進行敵意收購。特別是當大股東持股量低過50%嘅時候，若第三方真有財力進攻，不斷地喺二手市場上吸納，最後提出全面收購嘅建議，收購價一定會比現價為高。好似早前炒電視廣播(511) ，就係炒可能有人敵意收購。因為黎瑞剛、陳國強等大股東嘅持股量不足30%，敵意收購嘅空間比較大。之前炒大酒店，有些少博搶購嘅味道。由於大家都不知道蔡華波是何許人也，見他短時間內買入超過11%嘅大酒店股份，而且不怕高價買入，大家就懷疑佢有後着，可能會聯同其他股東進行收購。
當然，要成功敵意收購大酒店嘅機會不高，因為嘉道理家族早於80年代已面對過劉鑾雄(大劉)嘅敵意收購。嘉道理家族現時持有大酒店50%以上股份，好難喺違反佢意願下，以全面收購方法搶佔公司。餘下嘅唯有係善意收購，即是出比較貴嘅價錢，從嘉道理家族接收股份。大家都知道，嘉道理是非常富有嘅家族，持有這個生意已近百年。你畀佢哋三、四百億買大酒店，佢哋拿着這些現金都唔知做乜好，所以嘉道理家族唔會咁易沽售。
收租股息率低唔吸引
大酒店管理層如今披露蔡華波嘅信件，像是一盤冷水，清楚地告訴大家，蔡華波連進入董事會也沒有要求，只是作被動投資，大家便很難寄望這會是敵意收購，甚至全面收購嘅機會。
作為一個長線投資，大酒店可能有一定投資價值。大酒店去年盈利下跌到6.8億元，按年下滑33%。主要原因是受到王府半島酒店大規模番新，要局部關閉影響。隨著上半年王府半島酒店翻新完成，大酒店現有酒店嘅翻新計劃結束。估計大酒店未來收入會提升，下半年甚至會比下半年好。
如果大酒店股價是9元嘅話，會有相當投資價值。可惜大酒店股份即使已回落咗，還是13.94元。上星期五公佈業績後升0.4%，這種價錢仍有點雞肋。大酒店歷史市盈率高達32.3倍，息率只有1.4厘。如果今年盈利回升至11億元，預計市盈率會回落至20倍，派息率略為提升。
問題就來咗，20倍是否真嘅很吸引呢？大酒店這類股份是穩健股份，似一隻收租股，有3厘派息率會比較吸引。股價上升，派息率下降，便沒有太大吸引力。如果你問我，我有點擔心大酒店已經炒完。未來股價既要看大市，也要看炒作資金會否退潮。即時買入嘅人不沽出，只要街外人覺得沒有得炒，不跟着炒，股價也可能會反覆回軟。
炒賣這些資產股，真嘅要看公司有沒有搞作。香港很多公司都是由華資大老闆控制，街外人惡意收購嘅機會不大。反而是大股東願意搞作，體現股東價值，股份表現便會好一些。像地產股長實(1113) 和恒基(012) ，公司不斷搞作，又送紅股，又搞併購和重組，股價表現才會好些。
陸羽仁
金融High Tea 舊文
來源 source: http://hdfin.stheadline.com