智取大市：九倉系似有後著
■九倉主席吳天海喺3月全年業績時，講過研究將部份投資物業分拆上市。 資料圖片
上星期五，大藍籌終須唞嚇氣，資金流去二、三線股，商品股先急升後急回。大市唔似有即時大跌風險，但投資者越嚟越意識到港股上升動力不足，買貨就會減少，同時有一直等高位食糊嘅投資者發現短線上
升空間不多，就會先食為敬，令沽壓逐步增加。直至有一日，沽壓大到令港股下跌至吸引新資金入場嘅水平，就會見底再升過。喺呢個調整壓力逐漸增加嘅初期，穩陣起見，倉位要比早前減低至少兩三成。
短線嚟講，仍可留意九倉（004），佢揸七成股權嘅海港企業（051）率先公佈中期業績，罕有業績公告字眼猶如唱衰自己公司，「惟大額的土地增值稅削減核心盈利增長至僅得6%」、「預期土地儲備減少會令2017年後的發展物業貢獻大減」、「預期發展中項目會影響集團的現金流及盈利。預計2017年會有大量淨現金流出。」莫非想同自己作對？其實……係唔想街外人買隻股箒。
回帶去返今年3月全年業績時，九倉曾講過研究將部份投資物業分拆上市，持有投資物業嘅海港企業係咁唱衰自己，似係有好嘢收收埋埋唔想益你。九倉星期三將會公佈中期業績，績前有大量外資行吸貨，短線可保強勢。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com