中環在線：趙海珠重返金融界做公關
■前新聞之花趙海珠話新工性質同之前做開好唔同。資料圖片
前新聞之花、育有一對仔女嘅趙海珠（Alison）最近重返職場，加入弘達金融（1822）旗下弘達財經公關。佢話，自己一直都有個心想出番嚟做嘢，見細女16個月大，咁啱有獵頭公司搵佢，所以就「出番嚟試
一試」，上周返工，正適應新工作環境。
同囝囝關係好咗
Alison做咗約3年全職媽媽，佢話，開工前已經安頓好曬屋企，一早畀定心理準備4歲半大仔，阿仔都接受到佢返全職。返全職後，大仔可能因為全日冇見過媽咪，一見到佢放工返屋企都好sweet，會攬嚇錫嚇，關係仲好咗㖭。
問到Alison工作上有乜目標，佢就話，新工作性質同之前做開嘅唔同，做好手頭工作先。至於待遇，佢強調「唔係啲咩天價叫我番出嚟，因為都知自己off咗個market一段時間」。
咁珠珠加盟呢間又係乜公司呢？根據年報，弘達金融似乎百足咁多爪，業務包括汽車租賃、材料貿易、貸款等等，公司今年更有唔少新動作，包括聯同中國信貸科技（8207）同美成集團收購平安證券（231）36%股權。而珠珠做嘅呢間弘達財經公關，據資料，係今年6月成立，唔知會唔會係弘達金融另一個新發展方向呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com