Money Walker：內地資本管制向外延伸
■十九大召開前，內地各方面監管明顯收緊。 資料圖片
十九大召開前，內地各方面監管明顯收緊，金融相關嘅控制措施當然亦走唔甩，排查明星企業海外併購交易都未夠，小至平民百姓於外地提款購物，當局亦唔放過。
內地之前公佈咗一系列關
於海外提款嘅監管，例如要求內地銀行卡喺境外消費或提款過千元需上報，以及內地銀聯卡持有人於澳門提款時要出示身份證同進行面容辨認。呢啲措施反映即使中國整體走資規模已因人民幣貶值壓力消退而大減，阻截走資似乎仍然係中央目標工作，而且係大範圍地作管制，不只針對某一類型走資渠道。
澳門近年頻頻有小規模管制措施推出，當連四位數字嘅小規模走資亦要堵塞，難免令人擔心獲大量北水湧入嘅香港係咪可以一直倖免？短期內中央可能為咗維持人民幣國際化進程或其他原因，不但不出手打擊，更反過來鼓勵北水湧港購買資產，令到香港呢個彈丸之地，萬物皆可繼續被北水擁高，但到五年後中共嘅「二十大」、十年後嘅「廿一大」舉行時，又會係乜嘢境況？
香港地最近呢五、六年，賣地、賣樓、股市、零售、旅遊等範疇，通通都極度依賴北水支持。除非未來內地經濟轉強至足以吸引資金回流，否則中央將長期維持資本管制方向以控制走資，一旦有朝一日其資本控制之手延伸至本港，本港肯定會有大量依靠內地人或資金為生嘅產業受累，屆時香港經濟以至港人飯碗何去何從，不得不認真思考。
El.
El.
Money Walker - El. 舊文
來源 source: http://hk.apple.nextmedia.com