中環在線：邊個畀海航譚向東戴綠帽？
■譚向東（中）話對「綠帽事件」印象深刻。朱永倫攝
海航瘋狂shopping，進行海外併購早已唔係新聞，不過原來買得多真係有煩惱嘅時候。集團副董事長兼首席執行官譚向東噚日出席論壇時，講起其中一個挑戰就係40萬名員工來自五湖四海，要管理一啲都唔簡單，
佢自己就親身經歷過當中嘅文化衝擊嘞。
話說，有次佢哋去同美國人打高爾夫球，人哋好熱情招待，仲揀咗一堆綠色嘅帽畀佢哋戴，遮遮太陽吖嘛。但對於中國人嚟講，綠帽呢回事，男人最忌諱。佢話，最後成班中國人都冇用到，呢件咁芝麻綠豆嘅事，就令佢深深感受到唔同國家之間嘅文化差異。
稱債務狀況7年來最健康
提起海航，大家最近一定十分關注佢哋嘅財務狀況，孖屐一直關注佢哋能否為啟德四幅靚地做到再融資。譚向東好識做，自動波喺論壇上面提到海航嘅財務狀況。
佢話，海航過去5年增長迅速，以旅遊、物流同金融服務為三大核心業務，今年上半年收入增長超過一倍，利潤增長45%。佢強調，集團嘅資產負債率持續下降，目前債務狀況係7年來最健康嘅水平咁話。而隨住中美保持良好關係，海航仲會繼續喺美國投資，亦會考慮一帶一路沿線機會㖭。照佢咁講，海航依然有美好前景，為啟德地再融資應該冇難度喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com