操盤手札記 - 割柑人 2017年9月7日
操盤手劄記：資金聞戰鼓思A股
■人民幣升值，中資股估值有望重估，利好中港股市。 資料圖片
港股連升八個月，累升27%。不過，過去幾個月係「炒市唔炒股」格局，資金炒嚟炒去都係嗰幾隻指數重磅股。炒市，你買啱邊就有錢賺；炒股，個市升你買嗰隻未必升。到8月尾開始轉返「炒股唔炒市」，股仔又見鑊氣。
喺一眾老散摩拳擦掌之際，北韓亦磨刀擦槍，周日突然核試。今次係北韓第六次核試，舊年嗰兩次，咁啱都同今次一樣，係喺恒指正值高位，剛由強轉弱時發生，正好為調整提供藉口。今次事發至今，恒指三日反覆累跌340點，調整完未？要睇北韓周六係咪再射導彈。
特朗普對金正恩核試，以威脅制裁同北韓做生意嘅國家作回應，明擺中國上枱，皆因中國係北韓最大貿易夥伴。不過，中國亦係美國最大貿易夥伴，美國已經制裁俄羅斯，若再制裁中國，相當於一次過同全球兩大經濟體爆發貿易戰，對美國衝擊難以想像！估計頂多只會搵幾間中國公司出氣。
市場解讀金正恩連番挑釁，係利用中美俄微妙關係兵行險著，只係靠嚇，未至於打仗。不過，開戰風險雖低，避險情緒難免，資金流入黃金、日圓等避險資產，由於中國係僅次於日本嘅全球第二大淨債權國，人民幣亦有避險資金流入。
人民幣兌美元官價連升八日，累升1,268點子；今年以嚟已升值6.2%，扭轉貶值預期。人民幣升值，中資股估值有望重估，利好中港股市。人民幣嘅升勢，反映資金正在重返內地，喺戰鼓敲響下，滬指連升四日係不爭嘅事實。
9月外圍變數多，除咗朝鮮半島危機，仲有美國可能縮表、美國債務大限等，不得不防，始終港股過去八個月升咗唔少，所謂「食得多，痾得多」，隨時借勢大幅回調。不過，中國10月召開十九大，人民幣同A股料有維穩行情，我繼續睇好A股，上月初已著手建立A股倉，三大A股ETF（2822、2823、3188）亦係逢低收集之選。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com