內房股大爆發
2017年09月19日
港股上個禮拜呆吓呆吓，無跟美股上市，呢個禮拜一開市就大力爆上，尤其是內房股大大小小齊齊爆發，幾乎買親都中。
內房股喺幾隻大股推動下愈升愈有，陸羽仁話佢有大戶夾倉概念，逢低可以買吓嘅恒大(3333) 再升3.7%，報27.75元，最高仲去過28
.6元。雖然騰訊(700) 股價都升，主要股東馬化騰嘅身家都多咗，但由於升幅冇恒大咁勁，令恒大主席許家印喺褔布斯富豪排名超越馬雲同馬化騰，成為中國首富。
恒大股價一年由5.4元升上嚟，足足升咗五倍，大家講緊嘅都係同一間公司，好多人見佢咁升都唔信，唔信唔買唔緊要，最緊要係唔好唔信邪走去沽空，因為佢背後班大戶玩家個個都身家豐厚，普通人走去對賭，絕對係高危玩意。有啲專業沽空炒家，佢哋造淡策略係好靈活，形勢唔好就反手造好都敢死，散戶如果冇咁嘅技巧，咁寧願唔好玩，或者等佢跌得低啲先入貨，博佢夾起時又走一轉仲易賺錢。
「投機的我」要知炒乜
內房呢陣炒起，主要係市場憧憬內地「金九銀十」樓市銷情向好，但正如我噚日所講，內地樓市銷情都係個別發展，唔係個個城市都得。舊年內房銷售數字已經增長得好勁，係咁嘅基數下好難再大幅飆升，就算賣樓有增長，但同股價升幅點都冇得比。同一間公司變化唔係咁大，股價升咁多，學院派啲聽講係估值唔同咗，直接啲講係炒開唔可以俾佢停。
去年睇好內房板塊，係佢受惠去庫存同中央打壓政策冇加強，市場環境有好轉；今年炒內房，反而係因為樓市無論量價都去到高位，內房商都知好難再有大幅增長，所以紛紛搞嘢想轉型，大家於是炒吓概念，呢個係有投機性嘅行為，投資者買內房股要知買乜，「投機的我」入市短炒，千祈唔好真係以為今年「金九銀十」買樓係影響股價嘅真正因素。
內房一擁而上，大股做咗火車頭，碧桂園(2007) 升咗近5%，收報14.2元；融創(1918) 升近3%，報收34.34元。幾隻大股中段都創咗新高，尾市都回番啲，顯示投資者都醒目，高位就開始食胡，估計短期都要消化吓。至於其他內房股相對落後，追升幅度仲大，花樣年(1777) 急升13%報1.29元；佳兆業(1638) 升10%報5.22元；富力(2777) 升10%報20.65元；百仕達(1168) 升9.5%報1.72元；遠洋(3377) 升8.3%報5.77元；潤地(1109) 升7.5%報27.1元；連大隻佬嘅中海外(688) 都升4.9%報29.2元。
落後金融股都炒起
大市持續攀升，先收復10天線，再升穿28000，最多升352點，高見28160點，並以接近高位收市，恒指收報28159，升352點；國企指數收報11195，漲128點，成交金額1119.55億元。
個市周一大力衝過兩萬八點，好多板塊都造好，多間大行唱好騰訊手遊登錄任天堂Switch平台，花旗更俾392元目標價，騰訊周一股價收升2.13%報346元，再創新高，為恒指貢獻63點升幅；市傳友邦(1299) 有意收購澳洲聯邦銀行旗下保險業務，友邦周一升2.29%報收60.35元；港交所(388) 更升4.3%收報218.2元；滙控(005) 升1.06%報76.15元；三股合共為恒指帶來115點升幅。市傳內地有關當局將叫停佣金戰，內地券商股炒起，中信證券(6030) 升8.5%報18.3元；中國泛海金融(952) 升7.8%報1.11元，金融股相對唔係升得咁多，想炒落後佢哋就合條件。
發改委已啟動國家智能汽車創新發展戰略，比亞迪(1211) 再升逾9.39%報61.75元，其他汽車股都造好。
陸羽仁
金融High Tea 舊文
來源 source: http://hdfin.stheadline.com