【大茶飯】危中有廢的財路（青冰）
大市破咗大時代高位之後，chok上chok落，妖股曾經橫飛，的確令人擔心爆煲。不過上星期五見到平保(2318)破頂，似乎內險股仍然強勢，而內銀內險將於未來兩星期出第三季業績，港股在第三季表現咁好，而平保早個零月又曾經漏口風，成日用港股通買港股，咁投資收益
肯定唔錯，所以如果要搏大市再上，首選應該不再他想。
十九大有唔少焦點，環保亦係一個重要議題，要推電動車，搞好環境，建設健康中國，相信絕對係一個「中國夢」，但睇番在港上市的環保股，在今個升浪似乎唔見有太大得益，東江環保(0895)及中滔環保(1363)個圖都係嚇死人，係北控水務(0371)及光大綠色(1257)比較好。
而青冰留意到上周大和曾發表報告，唱好北控水務，原因係佢地在國內有11個處理危險廢物的項目，由於政府的環保法會更加從嚴，相關危廢處理將大有可為。再check真啲，原來東江環保5月在A股市場配股，集資20億人仔就係搞危廢處理，而光大綠色有5月及9月，總投資16億人仔，亦係簽入危廢處理項目，由此可見，在大家還未留意到咩係危廢，唔少環保企業已經開始做部署。
新宇環保(436)去年由創仔轉去主板，但仍然係較少人留意，青冰就係搵開危廢嘅料，先至發現佢地逾七成收入來自危廢，上半年純利4684萬人仔，絕對唔失禮，來自經營的現金流，在過去5年都係凈流入，講真仲正氣過唔少你熟識的股份。如果你相信其他環保企業的部署，咁新宇係值得寫入備忘，圖表上有些少圓底跡象，上星期稍作突破，唔知係咪受北控水務個大和report所推動呢，不過亦要留意番佢平時交投疏落，小注怡情似乎較佳。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com