智取大市：
港股的微妙變化
■市場情緒漸見神經質，預計後市快將決勝負。 李潤芳攝
港股上周四大調整逾500點後，周五大幅反彈。同以往調整後反彈唔同，周五反彈來得比較急勁，更加有電動車電池原材料概念嘅洛鉬（3993）、中化肥（297）急升，同水泥股喪炒，氣氛轉變得相當快。由於反彈習性
有所不同，因此估計今後劇本同年初至今升浪比較，亦會有所不同。
點解彈得快咗？因為投資者無論睇好睇淡，都更趨神經質，有貨冇貨都處於不安情緒，有貨就驚跌市，冇貨就驚錯失牛三升浪，快沽完又狗衝返，形成無定向快上快落。
今年1月至7月，每逢一至兩個月先出現一次走鬼大調整。8月開始，單日大跌市日子8月11日、9月25日同10月19日，由個多月跌一劑，去到大半個月跌一劑，越嚟越密，符合市場情緒漸見神經質嘅特質。27000點至28700點期間三次大調整都未隊冧個市，近日更趨向上落市，但預計快將決勝負，市況隨之大幅波動。
周五熱門股反彈幅度2至5%左右，非熱門股反彈幅度比較細，力度強但未至於牛三feel，加上消息面並無大改變，最多只係維持原有狀況，即係大調整趕咗信心不足嘅短線投資者落車，而呢班短線客見反彈而驚死輸蝕，周五恐慌性衝上車，而形成港股急促反彈，但預計現金比例高、視周五大調整而伺機低吸嘅投資者為數已相對較三兩個月前減少，令升浪後續力量減低。
種種因素顯示，即時V彈形成牛三嘅機會，暫時略偏低，繼續視港股調整未完。
P.S.雖然小弟上周四表示要忍手為上，周五自己亦按自己策略按兵不動，但事後孔明，覺得相比按兵不動，另一個更理想選項，係周四冷靜bookmark幾隻大跌市強股，例如洛鉬、中建材（3323）、新高教（2001）等等，周五早段確認即市回穩之際買入，可謂即抽即獎。如果喺周四大跌市收市繼續尋寶，預備定反彈scenario，其實更易捕捉短線機會，下次小弟亦會留意，作為補強一著。
晉佳
智取大市 - 晉佳 舊文
來源 source: http://hk.apple.nextmedia.com