樓價離地 賣樓要快
2017年10月11日
美股喺高位滯滯地，港股觀望之餘，部份資金偷步炒吓《施政報告》為農地鬆綁，推高本地地產股，帶動指數回升。
港股依家主要成份股係國企股同內地民企股，本港業務為主嘅公司主要剩番公用同地產股。《施政報告》今日發表，資金偷步想炒選擇唔係咁多，公用股受美國加息同縮表影響，股價
今年一直受壓，好多喺近一年低位，地產股早排回左一陣，今個禮拜就借勢炒番轉，升幅主要係手頭農地較多嘅龍頭地產股，好似新世界(017) 終於升破12元關口，收報12.04元，算係多年嚟新高。
擁有唔少農地嘅恒地(012) 漲3.37%報收55.25元；新地(016) 升1.6%報收131.8元；信置(083) 升1.3%報收14.02元。
樓市難玩改炒股
市場睇好本港地產股，理由係覺得現屆政府同發展商關係有緩和，房策由過往打壓需求改為增加供應，傾向同財團合作，例如研究合作起吓上車盤，估計未來發展商會提出不同嘅農地發展項目，希望可以補地價起樓。中環茶友話，資金依家追逐地產股同其他股票，一大理由係樓市愈嚟愈難玩，樓價貴到堅離地，已經到左要父子同供嘅地步，加埋咁多辣招，投資物業易買難賣，大家無嘢炒咪買吓股票囉。
至於係咪咁睇好樓市，佢就話，呢排中資投地買嘢已經少左，如果無左佢地托市，氣氛好大機會降溫，以依家咁嘅價錢，好多發展商都覺得有樓不妨賣，所以個別大盤去到貨，市場氣氛叫做維持到，但其他樓盤銷情唔見得特別快，所以買地產股純屬短炒，唔代表睇好樓價。既然係咁，如果要揀地產股，除左揀佢地有農地喺手，最好揀埋佢地賣樓嘅速度，始終未來供應增加，賣得快先至好世界，如果流轉速度慢，咁有得執都蝕底過人啦。
滙控大班離任前交功課
恒指噚日收報28490，升左164點；國企指數收報11418，漲33點，成交915億元。
除左地產股，金融股表現都唔錯，滙控(005) 一度逼近80元大關，曾高見79.65元，收升1.42%，報78.6元，為恒指貢獻41點升幅。滙控呢排走勢唔錯，慢牛式爬升，再創一年新高。
最近市場焦點集中喺佢揀新行政總裁，市場盛傳會喺內部提升，新人上場前，估計舊老總歐智華會盡量催谷好業績同股價，令自己可以體面落台。滙控喺舊年開始股份回購計劃，加上業績改善，推動股價由45元殺上嚟，歐智華都算係交左功課。
另一隻走勢硬淨嘅大型銀行股係工行(1398) ，再升逾1%，收6.39元。
內地《中證網》披露，中國平安(2318) 同子公司近期集中增持工商銀行H股，截至目前合計持有工行H股嘅股權比例達到11.08%，中國平安同平安人壽分別持有6.04%同5.04%。
中國平安解釋，增持純粹係正常財務投資。工行係內地最大嘅銀行集團，表現同內地政策直接掛鈎，如果睇好內地金融股，工銀係最大嘅目標。
市場資金呢排有持續流向金融類股份勢頭，建銀國際研究部董事總經理蘇國堅預計，恒指第四季中旬前有機會升穿29000點至30000點，創年度新高。
由於年底前，美國將會作出今年內第三次加息，由於利率上升同企業盈利增長放緩，建議減持對息口較為敏感嘅科技股，同埋材料及工業股，轉為增持金融同必需消費品股份。
陸羽仁
金融High Tea 舊文
來源 source: http://hdfin.stheadline.com