中糧包裝強強聯合惹憧憬
2017年11月01日
港股期指周一結算完，噚日早段仍然軟軟哋，但晏晝就回穩。熱爆新股閱文招股告一段落，資金緊張情況紓緩，都產生若干利好作用。
習特會前人仔彈升
內地十九大閉幕，國際焦點去咗特朗普將會喺11月8至10日訪華。噚日一早在岸、離岸人民幣雙雙
走高，在岸人民幣兌美元早盤大漲逾200點6.6254，創逾一周新高。離岸人民幣兌美元日內急漲超百點，報6.6269。
人民幣喺九月走出「深V」走勢，振幅達到2000點後，喺10月依舊維持雙向波動。國慶假期後兩日大漲逾800點，在岸人民幣喺10月剩低時間內逐漸收回全部漲幅。由於美元指幾日內表現平穩，顯示人仔匯價可能係因為特朗普訪華，會逐步彈番高啲，營造良好會面氣氛。人仔上升，利好內地股市穩定。
滬指、深成噚日雙雙回升，上證指數收報3393點，升3點；深證成指收報11367點，升55點，成交就偏靜。恒指收報28245，跌90點；國企指數收報11507，下滑55點，成交963億元。以整個10月份計，恒指累積上升691點或2.5%；國指累積上揚597點或5.5%，國指較為落後，10月開始跑番贏恒指。
《華爾街日報》引述消息指，蘋果出年推出嘅新iPhone及iPad，將會改用英特爾(Intel)以至台灣聯發科技(MediaTek)生產嘅半導體，棄用由高通(Qualcomm)生產嘅半導體，因為高通扣起測試半導體嘅關鍵軟件。高通指蘋果公司侵犯專利，並申請禁制蘋果iPhone產品輸入美國。蘋果公司就指控高通利用市場壟斷，唔公平咁阻止競爭者以及收取巨額專利費。
高通同蘋果開片，反映美國喺資訊科技產業嘅超前優勢，無論係軟硬件，都佔有壟斷或者半壟斷地位，行業龍頭變成愈食愈多嘢，結果兩個大佬打起上嚟。資訊設備供應商其實都出現慢慢集中嘅趨勢，所以有啲熱錢都開始炒呢類股份。好似芯片股下半年都吸引資金流入，中芯國際雖然咁多年成績唔係咁突出，但喺呢個大趨勢下，股價反覆上升。
中芯猛將加盟逆市升
市場流傳前台積電研發處長梁孟松將加盟中國半導體代工大廠中芯國際，但係中芯國際一直否認，消息終於獲得證實。中芯國際董事會宣佈，梁孟松將加盟待任該公司聯合首席執行長，帶領中芯國際研發部門。中芯多年前上市，曾經因為上海市政府對呢間公司高度重視而雷聲好大，可惜多年來都唔算做得好出色，依家有猛將加盟，兼且資金搵緊呢類股份炒作，令佢嘅走勢都幾強，噚日收報11.96元，升3.3%。
最後講講上星期提過嘅中糧包裝(906) ，公司上日宣佈將對清遠加多寶草本增資20億元人民幣，從而持有該公司30.58%股份。其中10億元現金用人民幣支付，另外10億元用集團生產嘅鋁制兩片飲料罐出資。
此外王老吉公司亦將會向清遠加多寶草本增資30億元，佔該公司45.87%股份；現有股東智首喺增資後，喺清遠加多寶草本持股降到23.55%。消息一出，中糧包裝股價爆升22%，收報6.55元，由於王老吉同加多寶喺內地飲料市場實力好強，今次合作可以話係強強結合，令人憧憬。
陸羽仁
金融High Tea 舊文
來源 source: http://hdfin.stheadline.com