異動空間：跌市中的小確幸
■港股短彈過後，相信仍要再尋底，選擇離場為上算。李潤芳攝
個市暫時止瀉，不少蟹貨纏身的戰友都問：「好唔好趁彈減磅？」既驚低位斬咗買唔番，又驚唔減會再跌，心情之矛盾可想而知。決定去或留，最簡單是在圖表搵支持及阻力位，跌穿支持位就斬，升唔穿阻力位就減。不過，要個
價位走得靚仔，關鍵還是注碼控制。
走貨從來無話要all or nothing，一係走曬、一係唔走，係可以走一半或者三分之一的，視乎閣下持貨多寡而定。通常開得聲求救，虧損已經入肉，呢個時候減一半係正路做法。減完即彈的話，你仲有一半可以吼位沽，拉高沽貨價；萬一沽完再插，屆時閣下的虧損或心理壓力將大為減輕，也算是跌市中的「小確幸」吧！再斬埋另一半時，心理負擔也會細得多。望住股價係咁落，好易心浮氣躁，繼而胡亂操作，魏力早年試得多。希望「斬半留半」的做法可幫各位減輕傷亡，盡力保本迎接下轉升浪。
跌市之下，強勢股統統大平賣，魏力收到不少查詢，話之前miss咗班車，依家好想跳上車，例如吉利汽車（175）。睇埋《蘋果》即時新聞刊登的連登網民反應，魏力傾向相信短彈過後，港股仍要再尋底，暫時自己選擇離場飲杯茶、食個包，接飛刀的玩意就不參與了。
魏力
http://fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.finance.appledaily.com