平保買滙控的啟示
2017年12月08日
謎網50股中的核心股份康宏昨日被廉署上門調查，成為愛炒股仔投資者話題。不過，講到對大市影響，呢50隻股仔早已經無關宏旨。有中環茶友坦言，今年大市集中炒大股強股，若然要投機，好多散戶寧願炒作窩輪同牛熊證，呢啲至係佢哋最有興趣嘅下注目標，正因為少
咗人玩，所以佢哋一俾股壇長毛點名話唔好掂手，就變成弱不禁風，郁吓就碌低。
如果講有影響，茶友有興趣反而係平保(2318) 猛掃滙控(005) ，成為第二大股東。滙控早前有北水猛入貨，市場成日話係大媽掃貨，點知揭盅係平保屬下資產公司吸納。對於平保成為滙控第二大股東，滙控行政總裁歐智華喺深圳回應時話，平安資產管理由去年第二季，於滙控於50元以下開始吸納，主要因股息吸引，可配合其保險業務需要，強調這並非平保策略性投資，不會影響滙控業務策略。對於平保增持會否帶動滙控股價，佢認為科技股出現獲利回吐後，料大市明年將回歸傳統防守性股份，而滙控經過大舉重組及節省成本，相信股價會有上升空間，但佢同時強調滙控屬收息股而非增長股。
風水輪流轉 回報見真章
聽歐智華咁講，似乎佢對平保入股都心中有數。從平保今次係以屬下資產股東公司買貨，同歐智華話入股是投資性質講法一致，不過，如果平保持股量一直增加，影響力必然相應上升，管理層無理由完全漠視佢哋意見。當然，歐智華退休在即，相信呢樣嘢已經唔需要佢去考慮，相反，佢要多謝平保入貨，令到股價升得多啲，令佢有個好啲成績作為告別成績表。
平保入股變咗滙控主要股東，多少令人有風水輪流轉之感，皆因無耐之前，滙控仲係平保主要股東。2012年滙控本來仲揸住15%平保，當時決定悉售予泰國首富謝國民，當時總代價727億元，相當於每股59元。當時滙控係以溢價收購。交易後平保曾經一拆一，以宣佈時平保收市價57.65元計，同昨日收市價比升咗2.5倍，接咗貨的謝國民真係賺到笑。由兩間公司風水輪流轉，茶友好認同歐智華所講，滙控係收息股，若然要穩陣，買滙控都幾吸引，自從平保喺低位買入後，滙控呢一年股價都算係唔錯，但如果要追求增長，過去經驗證明，平保先係合理選擇。內地金融同保險市場照睇仲未飽和，所以雖然平保市值已經去到超過滙控，未來繼續跑贏滙控的機會仍然比較高。
平保增持滙控消息曝光，兩間公司股份昨日都上升，平保彈力唔錯，漲咗2.4%，收報74.75元，滙控(005) 升0.2%，收報76.25元。大市回升但反彈唔係咁有力，恒指收報28303，上升78點；國企指數收報11150，下跌11點，成交1210億元。前日插到股民叫苦連天的騰訊(700) 回升3.3%，收報378元；舜宇光學(2382) 上揚2.5%，收報111.7元。
星展︰騰訊短可炒長要防
星展唯高達調高明年恒指目標至33000點，即較今日收市價28303點，有約17%上升空間，明年恒指市盈率約13.8倍。該行研究部董事李聲揚估計，明年上半年有北水支持升勢，隨着企業盈利增長放緩、內地政策不明朗致北水南下速度受阻、美國加息縮表等效應顯現所影響，下半年或回落。佢又提醒，企業盈利增長今年極為理想，高基數效應下，部份明星股如騰訊(700) 盈利增幅明年料放緩。要預防萬一到年初發表業績遜市場預期，或觸發市場降評級。若單說近日騰訊從高位累跌約一成，對散戶而言短期可以留意。
陸羽仁
金融High Tea 舊文
來源 source: http://hdfin.stheadline.com