揸濠賭股勿忘賭牌因素
2017年12月22日
前兩日陸羽仁講起濠賭股唔同的表現，有中環茶友話，濠賭股雖然表現有參差，整體嚟講都係好發，不過，依家澳門傾緊賭牌續約，呢樣嘢都係不明朗因素，不能不防喎！
短線無礙 長線要留意
茶友的提點的確無錯。早前澳門特首崔世安發表《施政報告》，透露左博彩企業賭牌最快於2020
年到期，政府內部正檢討相關法例，深入研究長遠發展，如何使博彩業配合世旅中心、經濟適度多元的定位，目前仍在進行準備工作，屆時將要重新競投。對於重新投牌，陸羽仁有機會請教一名博彩業猛人，究竟今次只係走過場，抑或真係會有人被踢走？猛人聽後唔直接回答，只係笑笑口話賭牌續約要2020年，咁早講咪大家有排估？猛人打骰的博彩公司規模大，點睇都係續牌大熱門，但聽佢答得咁迂迴，可見呢次檢討都唔會單純走過場，必須要小心應對。
早兩年澳門曾經檢討賭牌，當時鬧哄哄話可能增發一個牌，結果最後乜都無，但呢2020年續約，崔特首咁早打定開口牌，睇落就唔似會一切如舊、行禮如儀，唔排除到時濠賭股就會變左個不一樣的天空，引入競爭絕對唔奇。
再諗真啲，自從澳門增發賭牌，大力推動當地博彩業，成個餅搞到好大，濠賭股動輒搞到成千億元市值，相當誇張。喺濠賭股賺咁多錢下，未來續牌無論用乜政策都好，相信「加辣」機會好大，所以喺估值方面，不能不做定呢方面準備。不過，學似猛人咁講，賭牌續期要喺2020年，雖然事前已經會有眉目，但都有一段日子。股市一年開成二百日，過早考慮呢個因素，咁就可能錯失左短線升浪，所以續牌可能引起衝擊，可以存在心中，炒作濠賭股之餘，若然見到股價太癲，講得前景太美好，就要記起係美好的一面外，都仲有啲牽掛唔可以完全擺低。正所謂短炒唔緊要，長揸留一手。
銀行保險明年初穩選
大市方面，全球市場依家都係等緊放假。歐美股市連升多日後開始獲利回吐。國家信息中心首席經濟學家、經濟預測部主任祝寶良出席論壇時表示，預期明年國內生產總值(GDP)增長將放緩，料增長介乎6.4%至6.7%，算係平平穩穩，內地A股喺穿左3300點後見到支持，上證指數啱啱收報3300點，升左12點；深證成指收報11118點，升114點，當中以燃氣、租售同權板塊升幅好啲。
港股恒指收報29367，上升132點；國企指數收報11596，升91點，成交883億元。美國通過稅改方案，長債息升，大體利好金融股，銀行同保險股繼續慢火煎魚，平保(2318) 彈升2.8%，收報82.5元；建行(939) 升0.6%，收報7.04元；滙控(005) 升0.32%，收報79.55元；國壽(2628) 升1.4%，收報24.65元。長息上升唔利債市，收息股也受影響，若然升得急連股市整體都會影響埋，但係息口未高到影響股市前，息差擴大對銀行、保險股都係有利，所以呢類股票應該係明年初穩陣之選。
陸羽仁
金融High Tea 舊文
來源 source: http://hdfin.stheadline.com