金手指：彩星玩具見月明
■彩星玩具主席杜樹聲。資料圖片
由2016年尾開始，孫柏文都一路叫大家買彩星玩具（869）。原因得一，就係佢市值15億，坐擁十億現金，佢嘅玩具業務，冇理由只值五億咁少。
當然，市場唔係傻得曬，當時有咁嘅估值，係因為佢嘅主打，忍者龜，不但被視為唯一產品，最慘就係
喺2015同2016年初兩齣電影後，銷路一落千仗。咁我喺2016年尾話，彩星玩具隻新玩具百獸王，將會好好賣。當時，呢個預測連公司管理層自己都唔信。隻玩具喺2017年初開售，不斷賣曬。睇美國啲炒玩具網，出現大幅溢價。
亦因忍者龜2016年上半有電影出，所以2017年同期要發盈警。彩星去到五月開始追貨，而喺五至九月，不斷進行股份回購。股價亦硬淨。我當時真係諗住等到2018年出2017全年業績時，隻嘢不但有錢賺，仲要證明唔係靠單一產品，股價就爆升。
點知，佢好大嘅客戶，玩具反鬥城喺九月申請債務重組，連我都嚇親。因佢欠彩星嘅金額，等於2016年下半加2017年上半嘅盈利。彩星股份回購，亦消聲匿跡。我都係諗住等到業績，先會有update。
點知，上個月，彩星玩具又動用現金回購股份。遇著消息傳出，美國玩具商唔會受玩具反鬥城債務重組影響，又要百獸王卡通繼續非常叫座，連帶玩具超好賣。今次仲唔係守得雲開見月明？2017年業績，比2016年唔會輸蝕，到時甩咗「獨腳戲」之估值，可以好快見兩蚊。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com