笑到最後：港交所目標$505.35
舊年港交所（388）經歷多次當頭棒喝，高明早有戒心，直至上星期終於按捺不住高追，電台主持朱子昭問點解見高先買
？「因為要同朋友傾偈，冇股冇偈傾」，相信多年後重溫，會係牛市下另一荒謬絕論嘅推介原因。但高明認為，即使買入原因荒謬，最後離場時贏錢嘅機會好大。
有人話港股A股化，高明唔同意，舊年港股狂升，上證升幅不足5%，唔應該用落後地區股市嚟比喻港股。正確比喻係：港股「樓市化」，股市將會複製樓市升幅，步入沽貨後要用更高價追返嘅升市循環。
兩者升勢起因，在於收乾。樓市早於十年前已出現升勢，因為政府推出辣招，人為收乾供應，住宅樓操於用家之手。港股冇政府護蔭，股市要靠投資者以年計收乾貨源及消滅蟹貨，舊年出現突破，好有可能係樓市背後資金移去股市。不論原因，樓市升勢循環已流入股市。
高明講過，騰訊（700）係太古城；平保（2318）係美孚，港交所係嘉湖山莊。雖然時空不同，但經歷接近：曾經有過美好嘅願景，天價出售，大浪完結，發現係一場泡影，一街蟹貨，漫長跌浪最後竟然翻生。更相似係，兩者都係追落後。根據資料，普遍樓市喺2012年已升破97年高位，同騰訊平保呢類先行者一樣，但嘉湖山莊97年平均呎價約5800元，2015年先升穿上次高位，破頂後至今再升62.3%。現時港交所股價仍未破頂，上次高位311.4蚊，複製相同升幅目標價505.35蚊。
不過，即使預言正確，至少有兩個可能：1）一年行曬人哋幾年走勢，即係波幅大到暈；2）同接近時間追落後，即唔係一年半載嘅事。
可能會有人話：你個食屎專家，亂咁噏啲目標價！對唔住，今次喺專家同師奶之間，高明選擇站喺師奶一邊。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com