國策透視：
港股兩大免死金牌
■踏入2018年，內地人對港股睇法突然非常樂觀，好似香港有金執。 資料圖片
港股不斷創新高，北水最為關鍵。踏入2018年，內地人對港股睇法突然非常樂觀，全部好似清兵心口掛個「勇」字衝埋來，好似香港有金執。筆者有同幾位內地投資者傾過，發現他們思維
和香港股民好唔同。對於他們來說，「H股全流通」和「同股不同權」改革推出，等於港股有咗兩大免死金牌。
H股全流通是將本來不能在港股市場買賣的內資股，變為可以買賣，涉及大概2.6萬億市值股份，大部份為國企股。H股全流通等於讓阿爺多一個渠道真金白銀吸水，作為大莊家，當然不希望港股今年大跌或大震盪，破壞搵銀大計。
至於同股不同權改革，則更加緊要。目前新經濟股主要在美國上市，包括阿里巴巴、百度、京東等，日後仲有小米、螞蟻金服。中證監高層已有公開講話，不能把這些新經濟股「拒於國門之外」。港交所（388）等於被賦予一項只許成功、不容失敗的國家任務，要將這些最有潛力的股份留在中國人地頭。如果港股今年出事，上述將成鏡花水月。
港股最大的風險，來自阿爺限制北水南下。去年底有傳中證監叫停港股通基金審批，恒指大插近兩千點，事後被證明為假消息。港股今年要完成H股全流通和同股不同權改革兩大國家任務，中證監自然要識做配合，要保持港股暢旺。
黃尹華
國策透視 - 習進錢/黃尹華 舊文
來源 source: http://hk.finance.appledaily.com