金手指：又可考慮入白銀
■近排資金似有重回金銀市場之勢，筆者加碼買白銀。資料圖片
官員講嘢，話「某某政策係政策」，好多時候大家都會好似孫柏文咁半信半疑。不過，如果講完之後冇幾日，180度飄移「澄清」。不論咩國家，都可以話呢位官員第一轉講過嘅政策，都確實好堅。最近嘅好例子，一定係花旗國
財長，話「弱美元是硬道理」冇幾日，經過多國財金官員、IMF等插完後，「澄清」話強美元先係國策。即係弱美元係國策。
其實，美元喺特朗普當選後，先開始升。就算美匯指數對上十個月跌咗好多，其實差不多比奧巴馬時代任何一刻都高。𠵱家，不爭嘅事實係花旗國收緊水，印鈔量下降。不過，特朗普確實將一半以前覺冇希望嘅一群，重新振作，令花旗國貨幣流轉速度增加，比收水速度快，所以近排鋁、石油等原材料都升。
仲有，不但聯儲局收水落後。更重要嘅係佢哋自己唔覺落後，即落後情況會維持。如果唔係2018年，呢啲就係一注獨贏金銀嘅時機。
不過，近年啲加密貨幣，成為打「紙幣狂魔」嘅要員。分散咗以前會衝入金銀嘅資金。所以金銀價都冇乜起色。不過今年，投資者同加密貨幣嘅關係，由啱啱拍拖嗰種快感，開始變成「係咪娶得」嘅憂心。各國政府啲父母官，係咁出招，所以有勢似啲人重返金銀市場。
好耐冇加白銀貨嘅我，都啱啱加注。就睇嚇事態發展。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com