大棋局：股市鬥搶錢時代
如果要用一句話去理解今年的股市，可以用鬥搶錢時代去概括。港股已升穿2007年高位，亦非常超買，唔少睇法認為港
股已進入高風險區。個人看法，港股剛食完頭盤，或者要唞一唞，但主菜未上，等主菜食完便差唔多散場。
先睇幾組數字便明白。傳平保（2318）旗下的陸金所最快3月就要嚟香港上市，估值4,680億港元；有消息指雷軍同投行傾deal，開價想小米IPO估值1.5萬億港元，或今年下半年來港上市；日本有機會出現本國史上最大規模IPO，軟銀集團旗下的軟銀（移動電話業務公司）準備喺東京證券交易所主板上市，預計集資額2萬億日元，有機會破1987年日本電信電話（NTT）2.2萬億日圓IPO規模；2013年先剛剛以250億美元私有化的戴爾（Dell），見市旺又想返嚟上市；全球最大音樂串流公司Spotify，預計春季在美國IPO，估值190億美元；雲端儲存服務公司Dropbox同樣考慮今年春季IPO，估值超過100億美元；最後重有全球史上最大規模的IPO沙地阿美石油公司，估值2萬億美元，估計在紐約、倫敦、香港其中一地或兩地上市。
主菜未上 宴席未散
估值嘅嘢不能太認真，隨你講有人信就得。上述數字說明，現時市況像街邊有人開檔玩魚蝦蟹，幾個自己友大大聲話自己又中，仍處於引人入場階段。等到阿嬸手上條魚被逼到破膠袋而出，阿叔隔幾個身位都要好勞嘈掟錢落枱叫人幫佢買時，先會突然話走鬼捲起枱布包錢走。不止香港，今年全世界股市的主菜都係巨型IPO。主菜未上，宴席未散。
QE時代有增量，縮表時代只有存量，大家喺現有水池內鬥吸水。美國加息、縮表，美元回流，會造成貨幣緊縮。當初搞QE就係唔想出現通縮，但唔收水，唔通全世界一齊做津巴布韋？所以有理由相信，今次牛市背後有政府推波助瀾，股市旺大家有錢齊齊搵，生意難做都暫時唔得閒理。
特朗普不停強調美股破頂係其功勞，中國放北水南下，搞H股全流通，都可見政府的手影。
但有政府暗推係咪實食冇黐牙？當然唔係，否則2015年A股唔會搞到一鑊粥，唔會十年一次股災。
港股大市到現時為止，仍未出現90度打直上爆升，冇直上通常就冇直落，而多數會三花聚頂，即就算見頂都有機會走。將欲取之，必先予之，現在先畀啲甜頭散戶，就好似每年有人請你食蛇宴咁。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com