港股要好 A股唔衰得
2018年01月30日
美股上周五大幅高收，港股跟升想挑戰23500點，但A股回調1%，大市轉跟內地掉頭回落，反映係北水主導下，內地市況有更高話語權。
網宿有景 觸發搶親
內地A股升穿3500點後，開始引發回吐。初步嚟睇，呢個係牛市初期表現，內地A股係
兩年前終止政策牛市，上證指數由5166點插低，好多股民輸到怕，經過兩年打底再回升，喺升市初期唔係咁多人敢入市。中環茶友舉個例，話好似北水最愛的股份之一平保(2318) 喺內地都有A股掛牌，但北水依然喜歡南下香港買佢。雖然係同一間公司，但係內地股民覺得喺香港買，就跟香港遊戲規則，無升停或者漲停，同時無政策性停市，係咁情況下，內地A股要發力就自然要耐啲時間。
睇番港股去年第四季起急升，但之前喺2015年跌市後，在2016年反覆打樁尋底，到2017年都係慢牛。內地A股上次係股災式下挫，理論上蟹貨仲多，所以消化創傷時間仲長，唔少券商係3500點之上都會叫客戶食胡沽貨，所以要等貨源慢慢歸邊。A股O依家主要概念係今年中佢會正式入摩，估計外資會逐步增加持股，令貨源慢慢流入基金手中。
去年中國經濟總量大體佔全球經濟總量的15%左右，增長量佔全球經濟增量的比重超過30%，以這個比重，外資喺中國股市持股量明顯偏低，主要係因為中國係環球市場的貨幣流通、股份流通有不足。隨著中國改善體制，外資將要逐步增加持有內地股市的比重。
今次內地股市回調，相關股份好似南方A50(2823) 跌咗近3%。宏觀啲講，未來若內地股市唔好，港股都會跟住，港股要升，A股都應該要造好，所以不妨考慮等內地股市回啲就吸納吓。
大市回調，但騰訊(700) 仍創新高，曾見476.6元，收市微升0.08%，報471.6元。上個星期，市場傳出佢入股內地A股網宿科技的傳聞，網宿其後發佈了澄清公告作出否認。網宿強調騰訊係公司重要的客戶及合作夥伴，但雙方未就A股股權合作事項進行過洽談，公司未收到騰訊提出的入股意向，騰訊亦沒有持有任何網宿科技的股份，不存在媒體報道所稱的「騰訊近期以10%的股份入股網宿科技」的事項。
成立18年的網宿，主打雲計算、雲安全、全球分佈式數據中心等業務的計算服務提供商，在CDN領域，佔領2015年市場份額的42.7%，位居行業第一。由於增長快速，A股股價曾經發飆近10倍，後來其他巨企好似阿里巴巴加入競爭，集團盈利回落，觸發股價下跌。不過，最近公司股價再上，引發咗入股傳聞。網宿在否認騰訊入股之餘，暗示業務經過一輪整固，已經重拾優勢，所以股價炒上，唔單係靠龍頭巨企入股炒作，自己都係有料到。呢個講法傳出，市場就估計呢一輪炒作，可能係想誘發大企業注意力，騰訊無傾，可能又吸引阿里埋嚟傾，最好就係上演一幕掟錢搶親O添。由呢個角度去睇，內地A股有一批擁有高新科技的公司，可以炒作併購，成為吸引資金入市的理由之一。
歐化表現無得估
恒指昨日跟住美股曾創新高，一度急升329點，高見33484，跟住隨A股回調，收造32966，跌187點，波幅都幾厲害；國企指數收報13659，下滑64點，成交金額1916億元。平保(2318) 屬下陸金所上市稍遲，借勢跌近3%，收報90.65元。
有傳iPhone X銷情欠理想，富士康位於河南鄭州的廠房，農曆新年期間停工23天，周一手機設備股向下，舜宇光學(2382) 跌4.8%，收報107元，為表現最差的藍籌股；瑞聲科技(2018) 跌3.7%，收報131元，呢個板塊都可以話係高危板塊。
以「歐化傢俬」商標從事傢俬零售業務的歐化(1711) 昨日首掛，收報1.6元，較發售價0.56元，上升1.8倍，不計手續費及佣金，一手10000股賺1.04萬元，抽中真係笑到見牙唔見眼。歐化公開發售超額認購1638倍，啟動回撥機制後，公開發售佔比回撥至50%都只有1億股。集團業務主要集中香港，計劃在明年年底前開設3間分店，行政總裁吳冠強於上市儀式後表示，正於新界西及九龍東與發展商及業主商討開店，並期望在第3季有新中端品牌推出，但暫時未有計劃在內地進行銷售，以目前業務規模，市值去到12.8億元，當然唔算係平，但佢來頭唔細，所以表現根本無得估。
陸羽仁
金融High Tea 舊文
來源 source: http://hdfin.stheadline.com