幾招防避抽水股
2018年01月18日
港股周一大升後唔肯調整，指數單日消化後升78點創收市新高。內房股碧桂園(2007) 出招集資，股價逆市下挫5.5%，收報16.8元。股市創高，從宏觀大氣候睇，仲未係急急離場的時候，但買股就要防買中高升急回股份。
恒生指數再創歷史新高，公司
上市成功老闆請人食咗2、300隻鮑魚，見到咁境況，有人擔心位高勢危。喺依家呢啲炒得熱熱哋的市況，無論做好、做淡抑或觀望，都係一種態度，都有風險。有人話個市急升，都係食胡離場隱陣啲，咁講的確無錯，前提係你走咗之後不再回頭，否則今日走咗，過兩日個市再升你又買番，咁風險咪仲高。
留意高估值板塊
牛市經過一年時間運行，慢牛逐漸行得快咗，2018年開局個市即升，本來以為行九步都要唞一唞，結果除咗一日調整外，佢一直殺上去創新高，力度有加強跡象。依家全球股市，美國係超級老牛，內地A股係慢牛，香港就有小小變咗壯牛。按照牛的生命周期，應該仲未咁快玩完，只不過大市升得咁急，創新高有啲太快，正常呢個位應該要打底，就算短期繼續衝，之後走勢上都有需要回調，補回裂口。
喺升市中，內房股昨日普遍回軟，主要係火車頭之一碧桂園宣佈配股及發行可換股債券，合共淨籌233.07億元，用於償還債務或用作一般營運資金。根據安排，公司將先舊後新配售4.6億股，佔擴大後股本2.1%，每股配售價17.13元，較周二收市價17.78元折讓3.7%，集資78.8億元。公司將發行本金額156億元的零息有抵押擔保可換股債券，所得淨額154.908億元。債券的初步換股價為每股20.5元，較周二收市價17.8元溢價15.6%，可悉數轉換為7.589億股，相當於經發行轉換股份及認購股份而擴大後股本3.4%。
碧桂園股價呢排猛升，抽水集資唔令人意外。講到底，股市乃係融資之地，用《大時代》名句，「股市原意，乃讓集資投資有其地，社會向榮，人皆有賺……」所以股價去到高位，就要留意公司會唔會集資賣股，出現這個情況，咁股價好大機會掉頭。
以港股現況，恒指站在峰頂，有幾類股份股價走得最前，包括內房、汽車、科技。呢啲股價集資誘因最大，當中科技股因為受市場歡迎，市值高，部份已經有賣新股或由舊股東配股，另外有能力者會分拆業務上市。汽車股同內房股依家估值都喺好高位，都有抽水誘因，特別係內房股做地產生意，始終都係資本密集行業，對資金需求唔低，好似碧桂園有好多項目推動緊，若然有好價錢，管理層自然會考慮配股集資。仲有好似手機設備股呢類估值高的公司，大股東可能都有興趣喺高位配股。
相反，本港大型地產股、內銀股、銀行股、酒店股，好多股價較資產值有折讓，配發股會有攤薄效應，咁佢哋抽水興趣就唔大。其他板塊就要視乎個別公司表現，好似保險股個別仲係偏低，未必會抽水，但累積升幅大又無分拆集資大計者，都有機會考慮。如果唔想買中集資急回股，就要留意呢方面因素。
股價高難分拆要小心
有大股抽水，但恒指仍勉力創出歷史新高，收報31983，升咗78點，升穿2007年10月30日所創的高位31958點；國企指數收報12868，上升81點，成交再增至1782億元，事隔10年港股破頂，如果考慮中港經濟發展10年增長咗咁多，而家估值應該平當時2、30%左右。
個市有力突破，主要係靠新經濟股王騰訊(700) 全程帶動，佢亦同創新高，以最高位收市，報449元，升1.1%；呢輪強到無朋友的港交所(388) 急升2.5%，收報295.6元，創2015年5月以來高位；內銀股繼續前行，建行(939) 升0.7%，收報8.19元；中行(3988) 上揚1.7%，收報4.31元；工行(1398) 漲1%，收報6.94元；農行(1288) 漲2.9%，收報4.3元，弱開的國壽(2628) 漲2.8%，收報26.2元，整體中資金融股甚有追落後味道。
另外不能不提周一上市的希瑪眼科(3309) ，股價第三日急升，收市漲32%，最高造9.98元，在10元關口回頭後收報9.73元，較上市價2.9元累升逾3倍，但有啲中咗籤的大好友喺呢個位仲話未願放手。
陸羽仁
金融High Tea 舊文
來源 source: http://hdfin.stheadline.com