財經評論：炒幣好過搞Startup
■虛擬貨幣賺錢路數多，不少IT人都投身「炒幣」行列。互聯網圖片
「新一輪財政預算案公佈將會撥款過百億支援創科發展……」這句話，猶如夏蕙姨上頭注香，一年總會見到一次。
以往政府都用大筆資源培育Startup公司，但自有公司被揭發挪用資金炒iPhone後，近年審
批已趨嚴謹。數到最多在香港做Startup的經過，一定是「原本幫公司寫app，身痕試嚇創業，加入科學園、數碼港等孵化計劃，但最後公司死嚇死嚇、拎唔到fund，又無肉食。」最後唯有硬著頭皮，繼續接寫app freelance來維持公司開支，直到意志磨滅。
最近，虛擬貨幣熱潮直捲全球，除了吸引炒家，一眾IT人都趨之若鶩，不少都投身「炒幣」行列。有做開Startup的A君同筆者指：「你話開間Startup，寫app起碼大半年，寫好又要吸引人download，又要比app store抽傭；之後仲要試個business model得唔得，又要搵人投資。𠵱家唔少大公司見投資幾次都搵唔到錢，要佢哋肯科水絕對唔係一件易事。想出到自己份糧？頭一兩年都唔使諗。」現時虛擬貨幣重視技術，財爺所指的「知識型人才」，可以寫自動買賣盤程式，識玩甚至可以網上開間交易所、炒差價都得，賺錢快過其他散戶一截。
「你話𠵱家炒股，恒指3萬炒到4萬點要幾耐？Bitcoin一日波幅都有一成啦！」A君坦言，虛擬貨幣賺錢路數多，好像教人掘礦、幫散客掘礦、買賣炒波幅等，不愁沒有出路。「識玩嘅，仲可以自己整隻幣，搞ICO，搵幾個KOL煲起佢，𠵱家無審查，marketing做得好，仲邊有人理係做咩？」
「搵快錢」一向是香港人最擅長的地方。「與其拎政府十皮嘢守株待兔，等人注資，不如炒轉博翻身！政府支援嚇虛擬貨幣發展仲好！你話係唔係泡沫，𠵱家賺到錢嘅，仲邊有人理？」A君邊向著螢幕買賣邊向筆者說。
記者：梁延宇
財經評論 舊文
來源 source: http://hk.finance.appledaily.com