啤酒股有啲泡
2018年03月14日
白宮禁止高通合併，美股回吐，但代表科技股的納斯達克指數續創新高，投資氣氛冇乜大影響，港股微升收市。要留意納指續新高代表後市繼續有得炒。內地A股就表現唔錯，航空同啤酒股表現較突出。
年初時，與股壇名嘴講起講起今年有乜股好買，名嘴睇好嘅一個板塊係
內地消費股，原因係內地經濟回穩。幾年前阿爺大力打探貪，搞到高檔消費行業冇啖好食。經過幾年調整，雖然送禮文化無復以前咁旺，民間嘅消費力就大有改善，整體結構比以前健康。
名嘴睇好內地消費股，但唔係樣樣股都買得，內地消費市場競爭激烈，如果入行門檻唔太高嘅行業，涉足其中好多時只係得個做字。佢睇好嘅行業之一係啤酒股，早前內地啤酒行業加價，喺內地算係好少見嘅現象，說明內地啤酒廠雖多，但全國性的大企業數量有限，已有少少共同議價能力。上市嘅啤酒股中，佢較為睇好華潤啤酒(291) 。
政府架構重組或惹炒作
大型內地啤酒股，主要係華潤啤酒同青啤(168) 。青啤品牌好靚，經營也好，是最早來港上市的國企，又係表現最好嘅公司。只是青啤估值幾貴，而且策略較為保守。相對上，華潤做啤酒係後來者，原本係華潤創業嘅業務之一，經大力發展後年前重組，出售其餘非啤酒業務給母公司，集中資源主力做啤酒。
華潤主要營運雪花品牌，係內地最大嘅啤酒商，過去走比較大眾化的路線，近年開始拓展高檔市場，成績算是不俗。內地呢輪炒作啤酒股，一個原因係傳出華潤想向外資收購啤酒企業。消息傳出後，當事人雖然冇承認，但態度俾人聯想空間。
華潤啤酒估值都係唔平，呢個係消費股常見現象，內地昨日就炒作哈爾濱啤酒會加價，高估值股份要睇前景，有增長空間，有消息就跟炒，帶動咗內地A股做好。潤啤市盈率高達139倍，股價開市時跟住內地上升，收市只係微升0.05元 ，報34元：青啤收市就跌0.4 5元，收44.2元。從估值睇，啤酒股有啲起泡，不過可能股民覺得咁先有味道。
港股上日大升之後，走勢有啲反覆，高開後回軟，收市稍為做好。恒指收報31601，升7點；國企指數收報12746，上漲49點，成交金額1102億元。美國科技股造好，騰訊(700) 開市再升，佢將於下周三(21日)公佈業績，有大行去年第四季收入符合或優於預期，目標價由原來482元大升至538元，重申「買入」評級。騰訊全日報462.8元，升0.61%。內地昨日宣佈政府，架構重組方案，唔排除個市會跟著方案炒作。
農行抽水反獲大行唱好
農行(1288) 日前公佈去年盈利增長4.9%勝預期，且不良貸款「雙降」，該行同時建議向匯金及財政部等七名投資者配售A股，籌不多於1,000億元人民幣。配股消息本來可好可淡，不過有大行就話農行配股可消除資本緊張嘅不利因素，加上業績穩健利，唱好佢股價，呢樣都反映到外資銀行對內銀股的估值冇以前咁嚴厲。農行喺幾間龍頭行中，算係稍弱嘅一間，呢次出業績後都要抽水，但估值被調升，都可以話係好彩，當然你亦可以話係因為佢股價平，同埋未來農村增長有人睇好。農行全日報4.71元，升5.4%。
幾隻新股掛牌，表現最差係江蘇省最大期貨公司弘業期貨(3678) ，H股收報1.97元，較招股價2.43元，大跌0.46元或18.9%，高位2.42元，低位1.96元，全日成交額4,335萬元。一手1,000股帳面蝕460元，散戶中左都幾入肉。
陸羽仁
金融High Tea 舊文
來源 source: http://hdfin.stheadline.com