低撈搵到食
2018年03月27日
港股上周五畀人打兩搥，同一時間騰訊南非大股東減持，加埋美國總統特朗普簽署法令，要對華入口貨品徵收關稅。恒指昨日低開，最多插咗300點，但午後轉跌為升，若然低位一如陸羽仁建議，趁早段跌市入貨都應該是搵咗水。
中美傾偈帶動反彈
恒指開市沽壓未停
，強勢股繼續捱沽，我在網誌話，「恒指上周五收30309點，今日可能一波下試一個月低位29886點，下一個支持位是三個月低位29460點，未必咁易跌到此位，短炒可在試一個月低位時收集，博短線走一轉」。恒指上午低位稍穿30000點，去到接近中午，跌幅開始收窄，部份原因係美國官員主動打電話畀呢次同美國對陣的政治局委員劉鶴，又話會派官員去中國講數，反映特朗普在開戰之餘，背後唔係無得傾。恒指上星期五插咗1000點後彈番啲收市，昨日再插300點，下午轉跌為升。
美國對中國開徵關稅細節已經公佈，第一波衝擊最高點暫時已經出現咗。要落實相關措施，中間仲有好多程序會走過，開始進入震後時期。對於未來發展，評級機構標準普爾認為，貿易戰唔係不可避免，美國擬議中對華關稅措施和投資限制，不太可能對中國經濟產生深度傷害。跟住要睇是中國採取何種應對措施。若雙方採取更激進行動，則有可能演變為世界最大兩個經濟體之間全面貿易戰，並對全球企業信心、投資和增長產生溢出效應。
標普認為，只要中國報復措施暫不升級，企業信用受到短期影響，可能就不明顯，但某些行業仍將受到一定衝擊，具體要看這些行業對中國市場依賴程度如何。有報道話，劉鶴表明會有反制措施之餘，話中國唔想打貿易戰，由於中方態度堅定中較為理性，亦有利大市出現反彈。
騰訊南非股東三年內不減持
恒指再度保住三萬點大關，午後跟隨A股升幅走勢轉跌為升，並以全日高位收市，恒指收造30548點，上揚239點；國企指數收報12197點，漲69點，成交1411億元。中資三桶油成為支撐大市動力，中石化(386) 去年純利按年增長10%，業績勝預期，加上派息倍增為市場帶來驚喜，刺激股價升5.2%，收報6.93元，為表現最好藍籌股；中石油(857) 及中海油(883) 同樣錄得升幅，中石油漲1.5%，收報5.45元；中海油升2%，收報11.74元，三隻股份合共貢獻恒指47點升幅。
騰訊(700) 低位見過412.4元，收426.4元，已從低位彈3.4%，算係有足夠水位食胡。佢受大股東減持消息影響，近日接連下挫，總市值一度跌破四萬億港元。騰訊董事會主席馬化騰就連環出嚟派定心丸，一面大讚南非大股東，話理解對方做法，佢仲透露，對方承諾三年內不再減持。
馬化騰出席呢次活動，主要受廣東省長馬興瑞之邀，騰訊目前正在推進「數位廣東」建設，此外也已接到其他省份意向定單。「數位廣東」是廣東省打造數位經濟強省工程稱號。去年10月，騰訊與中國移動(941) 、中國聯通(762) 、中國電信(728) 三大運營商為推進「數位廣東」建設，專門設立合資公司數位廣東網絡建設，註冊資金兩億元，騰訊持股49%。市場擔心騰訊今年有好多投資要落實，對公司財政有壓力兼拖慢增長，馬化騰回應多少有回應市場關注味道。
騰訊中建材一日已夠水位
另一隻撈底可以食胡的股份係中國建材(3323) ，佢最低插到7.3元，收市報7.97元，倒升0.52元，佢喺8元之下有支持，今年喺呢個水位浮沉，上個星期話如果佢插破8元可以短炒，睇位夠準就可以走一轉，短期有市睇嚟都仲係會波動，高追要小心，反而低位撈貨有機會搵到食。
陸羽仁
金融High Tea 舊文
來源 source: http://hdfin.stheadline.com