智取大市：睇基金死穴部署
■騰訊最近俾人睇死，冇信念嘅投資者相信已離場，反而有利後市反彈。 資料圖片
過去幾個星期，恒指維持喺千幾點嘅範圍內急Chok，單日波幅甚大。投資者覺得搵食艱難，於是近期甚少人願意捱價，短線進出次數亦減少咗好多。
近期下潛股數目比起上升股為多，升嘅本地銀行股、零
售股、風電股、醫藥股，下跌嘅普遍係舊年嘅主流股份。對於基金嚟講，困難嘅地方係重注嘅科網股近期普遍表現唔太好，而資金避難以銀行股最可取，但銀行股波幅遠低於科網股，潛在回報非吸引，至於零售股買盤較疏，難買得重注，換馬嘅話，同樣大大影響未來回報展望。既然不能進取，倒不如採取保守態度，呢個成為近期市況偏向淡靜嘅原因。
早前咁多壞消息之下，市況依然跌唔落，最大契機係貿易戰、中興事件等等負面因素紓緩，美匯指數一旦止升，就可能反映風險胃納回升，港股到時先有望步入真正反彈。如果覺得港股氣氛會回升，升勢就未必側重於近期強勁嘅零售股、銀行股，呢類股再升嘅話不妨分段獲利，因為基金重拾信心，照計會同你掃高持重倉嘅主流股份，典型股當然係騰訊（700），最近俾人睇死，冇信念嘅投資者相信已離場，反而有利後市反彈。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com