Money Walker：槓桿、泡沫、爆煲的循環
■美元近幾周走強，觸發拉丁美洲國家股、匯、債大跌。圖為布宜諾斯艾利斯交易所。 資料圖片
歐元區、日本及英國等主要央行未敢收水，支持美元近幾周走強，繼而觸發拉美國家股、匯、債大跌。論亞洲基本因素，無論經濟定政治穩定性，本
身遠較拉美為佳，所以筆者唔認為拉美情況會喺亞洲上演，重演廿年前亞洲金融風暴慘況。不過有一點無可否認，就係拉美出事確實已經拉響咗危機警報，投資者絕不能對此掉以輕心。
最脆弱嘅新興市場因強美元出事，某程度上係美國多次加息後，環球流動性退潮嘅自然結果。借古鑑今，每次美國加息，走資都係由最脆弱嘅新興市場開始，下一步擴大至所有新興市場，最終連成熟市場亦會捲入漩渦，為股市派對劃上句號。
即使美國今年加息四次，亦唔代表股市呢刻就會玩完，問題只係當息口加至一定程度，難免會引爆泡沫。歷史上每次加息所引爆嘅泡沫都唔同，1997年係亞洲過度借貸、2000年係科網股瘋炒、2008年係美國樓市次按爆煲。今輪加息周期會引致邊度爆發危機，難以預測，因為環球低息量寬已實施多年，資產市場根本泡沫處處。
事實上，引爆危機嘅亦不一定係脆弱嘅新興市場，但凡槓桿過度嘅地方都屬高危。2000年代中期美國樓市、2011年歐豬多國，都並非新興市場，但一樣連累全球。回顧環球經濟歷史，人類總在流動性充裕、槓桿、泡沫、加息、爆煲中不斷循環，從無例外。只望今次爆煲源頭並非中港、亞洲或美國，而係其他與香港經濟關係較少嘅地方。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com